Ezekutivu timorense asina subvensaun ho JICA ba melloramentu ospitalár

DILI, 20 agostu 2024 (TATOLI) – Ministériu Finansa asina subvensaun ho International Cooperation Agency (JICA) ba meloramentu Hospitál Nasionál Guido Valadares (HNGV).

“Ha’u haksolok tebes atu simu ita-boot sira hotu iha serimónia ida-ne’e hodi marka asinatura akordu subvensaun entre Governu Japaun no Governu Timor-Leste ba hadi’a Hospitál Nasionál Guido Valadares”, Ministra Finansas Santina Cardoso, dehan iha andar II Torre Ministériu Finansas, ohin.

Nia dehan, Timor-Leste halo ona progresu ne’ebé notavel iha ninia viajen ba dezenvolvimentu no estabilidade. Japaun sai hanesan belun no apoiante ida ne’ebé konfiável iha prosesu ida-ne’e nia laran, kontribui maka’as ba nasaun nia kreximentu iha setór oioin.

“Dezenvolvimentu Hospitál Nasionál Guido Valadares nian sai fali hanesan sasin ida ba parseria ne’ebé dura. Bainhira kompleta ona, projetu JICA Grant Aid ida-ne’e sei hasa’e ho signifikativu kualidade husi ita-nia servisu saúde sira. Ida-ne’e sei la’ós de’it hadi’a ita-nia infraestrutura kuidadu saúde nian, maibé sei mós simboliza amizade ne’ebé dura entre ita-nia nasaun rua. Ida-ne’e reprezenta pasu krusiál ida iha ita-nia esforsu sira ne’ebé la’o daudaun atu hasa’e ita-nia sidadaun sira-nia moris di’ak no harii Timor-Leste ida ne’ebé forte liu no saudavel liu”, nia esplika.

Nia afirma, akordu subvensaun ohin nian, antesipa kooperasaun no kolaborasaun ne’ebé aumenta ho Japaun, la’ós de’it iha setór saúde, maibé mós iha setór ekonómiku sira ne’ebé luan liu, fiar katak parseria ida-ne’e sei inspira deskoberta oportunidade sira seluk no prosperidade ne’ebé fahe ba futuru ida ne’ebé sustentável.

Iha fatin hanesan, Reprezentante Xefe JICA Mimpei Ito, informa JICA asina akordu subvensaun ida ho Governu Timor-Leste hodi fo ajuda subvensaun to’o billaun 3.093 yen maizumenus USD millaun 20 ba projetu ne’e ba hadiak Hospitál Nasionál Guido Valadares.

“Objetivu husi Projetu ne’e atu hadi’a kapasidade prestasaun servisu no hadi’a kualidade servisu médiku husi Hospitál Nasionál Guido Valadares, úniku ospitál nivel tersiáriu iha nasaun, liuhusi konstrusaun instalasaun sira no fornese ekipamentu médiku relasionadu, nune’e kontribui ba hadi’a husi sistema saúde iha Timor-Leste”, Mimpei Ito informa.

Nia relata, bainhira asina akordu, dezeñu detallu sei hala’o iha fulan balun tuirmai, no hein katak konstrusaun sei hahú iha tinan klaran 2025 ne’ebé sei dura maizumenus fulan 21. Projetu ne’e inklui konstrusaun ba edifísiu foun ho andár haat ba departamentu ambulatóriu, sala operasaun sira, Departamentu Fornesimentu Estérilu Sentrál (CSSD), Departamentu Partu, no Departamentu Obstetrisia no Jinekolojia.

“Tuir planu, edifísiu foun ne’e sei liga ba edifísiu foun Pediatria no ICU, ne’ebe oras ne’e daudaun konstrui hela husi Ministériu Saúde, hodi hadia efisiénsia no seguransa pasiente iha servisu médiku emerjénsia. Projetu foun ne’e formula no implementa tuir aliñamentu ho Planu Mestre ba Hospitál Nasionál Guido Valadares Governu Timor-Leste nian”, nia informa.

Akordu subvensaun nian, asina hosi Ministra Finansas Santina José Rodrigues Ferreira Viegas Cardoso, no Reprezentante Xefe JICA, Mimpei Ito no hetan partisipasaun hosi Embaixadór Japaun iha Timor-Leste Tetsuya Kimura no Ministra Saúde Elia dos Reis Amaral.

Embaixadór Japaun iha Timor-Leste, Tetsuya Kimura, hateten Japaun tau importánsia boot tebes ba apoiu iha setór saúde Timor-Leste nian aliña ho polítika nasionál nasaun ida-ne’e nian.

“iha tinan 2017, Japaun apoiu ona HNGV hanesan haluan departamentu emerjénsia liu husi aumenta sala ezaminasaun foun tolu no fasilidade sira seluk, iha 2021 konstrui tan sala foun ida ne’ebé ekipadu ho mákina ultrasound iha departamentu radioativu nian, entaun ho projetu foun ne’ebé asina ohin ne’e sei kontribui ba bem estar povu Timor-Leste nian”, nia konklui.

Jornalista : Felicidade Ximenes

Editór : Zezito Silva