DILI, 20 agostu 2024 (TATOLI)–Igreja liuhusi Vigáriu Jerál Arkidioseze Metropolitana Dili, Pe. Graciano Santos Barros, husu ba timoroan hotu atu kria unidade nasionál no dame hodi bele kontribui ba iha dezenvolvimentu nasionál.
“Mensajen selebrasaun tinan 25 loron konsulta populár nian ne’e mak timoroan sira tenke iha unidade no dame atu fó biban ba dezenvolvimentu nasionál,”, Vigariu Jerál Arkidioseze Metropolitana Dili, Padre Graciano Santos Barros, hateten ba Agência TATOLI nakait ho komemorasaun loron konsulta popular ba da-25 (30 agostu 1999-30 agostu 2024), iha resintu Universidade Católika Timorense (UCT), Balide, tersa ne’e.
Tuir nia, bainhira iha unidade nasionál no dame iha sosiedade nia le’et, sei iha dezenvolvimentu di’ak ba nasaun no povu.
“Dezenvolvimentu la’o mak ita hein kondisaun no situasaun ida mak dame hodi fó biban atu halo buat hotu, se lae, ita labele no markar pasu iha fatin,” nia dehan.
Tanba, nia dehan, durante ukun aan no agora atu komemora loron konsulta populár ba da-25 ne’e, dezenvolvimentu iha pprogresu maibé iha dezafiu la’o hela iha prosesu dezenvolvimentu nasionál ne’e.
“Ita la’o hela iha dalan, ita labele halo avaliasaun. Buat balun pozitivu no kuran hela no seidauk la’o. Entaun, ita presiza kondisaun mak ita hein kondisaun dame hodi ne’e fó biban atu bele halo buat hotu,” nia hateten.
Jornalista : Jesuína Xavier
Editór : Cancio Ximenes
