DILI, 20 Agostu 2024 (TATOLI) – Ministériu Agrikultura, Pekuária, Peska no Floresta (MAPPF) harii muru protesaun ho montante $49.548,50 iha edifísiu ministériu nian iha Comoro, ne’ebé ezekuta husi empreza APEBY Unipesoal, Lda, informa Diretór-Jerál Servisu Korporativu MAPPF, Rufino Soares Gusmão.
“Ita liberta ona uma-kain 22 ne’ebé durante ne’e hela iha propriedade MAPPF nian. Komunidade ne’e ita fó ona indemnizasaun husi orsamentu tinan 2023 nian”, Rufino Gusmão dehan ba Tatoli iha Comoro, ohin.
Dirijente ne’e esplika katak muru ne’ebé harii ne’e sei konstrui edifísiu ida iha laran hodi fasilita funsionáriu sira serbisu ho di’ak, tanba durante ne’e Ministériu Agrikultura laiha espasu ne’ebé sufisiente.
Tanba ne’e, ministériu tau ona iha planu 2025 nian hodi konstrui edifísiu permanente ida iha fatin referidu. “Ita sei harii uma boot ida depois maka sei fahe ba kada diresaun, nune’e funsionáriu sira bele halo serbisu hodi fó atendimentu di’ak ba públiku”, salienta.
Nia informa katak parte tékniku sira hahú halo ona preparasaun ba planta no kadernu enkargu (BoQ) ba konstrusaun edifísiu ne’e, maibé sei hein rezultadu husi aprezentasaun orsamentu adisionál Ministériu Agrikultura nian iha Komité Revizaun Orsamentu (KRO).
Bainhira verba ne’e mak hetan aprovasaun, MAPPF sei loke prosesu aprovizionamentu, nune’e projetu foun sira ne’ebé planeia ba 2025 tenke realiza hodi tulun ministériu atu hetan espasu ida adekuadu.
Iha reuniaun KRO Ministériu Agrikultura, Pekuária, Peska no Floresta submete proposta adisionál millaun $40,6 tanba tetu fiskál ne’ebé simu hamutuk millaun $18,2 seidauk sufisiente atu kobre programa sira ne’ebé sei implementa iha tinan oin.
Notísia relevante: MAPPF husu proposta adisionál millaun $40,6
Jornalista: Tomé Amado
Editora: Maria Auxiliadora
