Pasiente barak hetan raan barak husi família no voluntáriu menus
DILI, 20 agostu 2024 (TATOLI) – Xefe Departamentu Banku Sangue iha Hospitál Nasionál Guido Valadares (HNGV), Alexandrinho Mendonça, hateten pasiente barak mak durante ne’e hetan raan barak liuhosi família no raan husi voluntáriu sira sei menus.
“Raan ne’ebé durante transmite ba pasiente baixa iha HNGV, maioria apoiu hosi família, ba voluntáriu sira sei menus, ba individu ida ka rua de’it maibé hosi grupu mak mai husi F-FDTL , grupu juventude igreja motael, joventude desportu no estudadente sira”, Alexandrinho Mendonça dehan ba jornalista sira HNGV, ohin.
Nia afirma, estoke raan iha ospitál estavel nafatin durante ne’e no laiha problema kona-ba raan.
“Atu garante estoke raan iha banku sangue mak maioria mai hosi família bainhira família balun baixa iha ne’e sira presiza raan sira-nia família mak mai doa raan no hosi grupu sira kada selebrasaun sira-nia loron boot sira sempre mai halo doasaun raan depois mak grupu individu rasik”, nia esplika.
Nia klarifika, informasuan ne’ebé espalla iha mídiál sosiál katak iha banku sangue, plástiku tau raan estoke laiha hodi difikulta ema halo doasaun raan ne’e laloos, tanba plástiku iha hela, maibé plástiku refere data espire besik ona.
“La’ós plástiku tau raan mak laiha, maibé plástiku tau raan ne’e atu besik espire ona, ne’ebé informasaun dehan plástiku tau raan laiha ne’e la loos”, nia dehan.
Nia relata, plástiku ne’ebé sai problema daudaun ne’e sira rezolve ona, Institutu Nasionál Farmasia no Produtu Médiku mak halo kompra emerjénsia hodi responde situasaun refere.
“Ami halo koordenasaun ho INFPM, no plástiku rezolve ona, iha INFPM sira kompra urjente, estoke plástiku iha ona ”, nia haktuir.
Nia informa, estoke plástiku foin tama hamutuk 350 no sira garante hodi responde ba fulan ida ne’e no iha tempu tuir mai INFPM sei kompra tan.
“Ita bele garante katak atendimentu pasiente iha ospitál nasionál kona-ba transfusaun raan ne’e bele garantia. Problema mak plástiku raan maibé rezolve ona problema seluk laiha”, nia hateten.
Estoke raan ne’ebé daudaun banku sangue prepara, raan hamutuk 48, husi grupu raan A 12, B 16, AB ualu no O 11.
Tuir dadus fulan kotuk nian katak totál ema doasaun raan ho voluntáriu mane hamutuk 91, feto 38 no doasaun hosi família mane 257, feto 51.
Jornalista : Felicidade Ximenes
Editór : Zezito Silva
