PN realiza programa Parlamentu Foinsa’e iha 22-23 agostu
DILI, 20 agostu 2024 (TATOLI)—Prezidente Parlamentu Nasionál, Maria Fernanda Lay, hateten PN sei realiza programa Parlamentu Foinsa’e ne’ebé sei partisipa husi estudante sira iha loron 22-23 agostu 2024.
“Hakarak hato’o, iha 22-23 agostu, plenária sei uza ba Parlamentu Foinsa’e iha Parlamentu ida-ne’e,” Prezidente Parlamentu Nasionál, Maria Fernanda Lay, hato’o iha reuniaun plenária komisaun permanente iha PN, tersa ne’e.
Antes ne’e, iha loron 12 agostu, PN realiza briefing ba estudante na’in-42 ne’ebé sei partisipa programa Parlamentu Foinsa’e nian.
Sekretáriu Jerál Parlamentu Nasionál (PN), Edgar Sequeira Martins, hateten programa Parlamentu Foinsa’e ne’e ho objetivu atu lori estudante sira hodi hatene funsaun Deputadu sira-nian iha órgaun soberania daruak ne’e.
Tuir nia, ida-ne’e hanesan programa PN nian ne’ebé kada tinan realiza no tinan ne’e realiza tabnba koordena hamutuk ho Ministériu Edukasaun.
“Programa ne’e lori joven estudante liuliu eskola sekundária sira iha territóriu mai PN hodi PN esplika ba estudante sira kona-ba lala’ok Deputadu sira-nian kona-ba iha PN,” nia hateten ba jornalista sira, iha resintu Parlamentu.
Ba tinan ne’e, programa Parlamentu Foinsa’e envolve de’it estudante sira iha eskola sekundária iha munisípiu Dili tanba haree ba kestaun tempu, nune’e iha tinan oin sei envolve husi estudante husi munisípiu sira.
Durante iha atividade Parlamentu Foinsa’e ne’e, estudante sira sei hala’o funsaun hanesan Deputadu sira sei halo diskusaun iha komisaun tuir guiaun ne’ebé mak iha, ne’ebé durante ne’e Deputadu sira aplika iha diskusaun komisaun.
Sei iha plenária no estudante sira sei sai hanesan mós Deputadu iha plenária hodi aprova ajenda plenária rasik, iha intervensaun no koloka kestaun sosiál ne’ebé identifikadu hafoin diskute no aprezenta solusaun.
Tan ne’e, nia hateten, objetivu husi programa ne’e mak introdús lala’ok iha PN ba estudante sira, tanba durante ne’e sira asiste liuhusi televizaun no dalaruma iha diálogu ho Deputadu sira, maibé ho programa ida-ne’e estudante sira-ne’e mak sei sai Deputadu no akompaña sira hodi sira bele entende ona funsaun hanesan Deputadu.
Iha fatin hanesan, reprezentante manorin husi eskola sekundária Canosa, Julio Fernandes, hato’o agradesimentu ba PN ne’ebé fó bibán ba foinsa’e timoroan atu bele uza oportunidade ne’e hodi kapasita aan aumenta sira-nia koñesimentu iha PN.
Ba programa ne’e, tuir nia, husi eskola sekundária Canosa iha estudante na’in-tolu (3) mak partisipa iha programa Parlamentu Foinsa’e ne’e.
“Sira ne’e selesionadu. Ami profesór sira haree sira-nia kapasidade iha aula, depende sira-nia koñesimentu liuliu ko’alia hatene uitoan iha polítika, situasaun rai-laran, mak ami lori mai atu profunda liután sira-nia koñesimentu no buka esperénsia, nune’e futuru mai sira iha mehi, karik bele mai tuur iha fatin ne’e prepara antes,” nia hateten.
Jornalista : Nelson de Sousa
Editór : Cancio Ximenes
