DILI, 20 agostu 2024 (TATOLI) – Prezidente Repúblika, José Ramos Horta, rekoñese papél FALINTIL nian iha tempu pasadu kursiál hodi hari’i nasaun Timor-Leste liuhosi terus no mate.
Xefe Estadu hato’o pozisaun ne’e bainhira partisipa iha komemorasaun aniversáriu FALINTIL ba dala-49 ne’ebé komemora iha Kuartél Jenerál Fatuhada Dili, tersa ne’e ho tema prinsipál “Celebrar o dia 20 de agosto é comemorar a luta das FALINTIL que não foi diferente, mas foi a única. É o momento de reflexão e de mudansas”.
“FALINTIL, ne’ebé ohin komemora tinan ba dala-49, moris nafatin iha timoroan tomak nia fuan no memória. Ita rekoñese militár nia papél krusiál hodi harii Timor-Leste ida ne’ebé seguru, modernu no prósperu,” Horta tenik iha nia diskursu.
Tanba ne’e, Xefe Estadu bolu ema hotu atu halibur esforsu sira iha luta hasoru ki’ak, hamlaha no inseguransa ai-han, no la’o ba oin ho determinasaun no esperansa.
Funsaun Forsa Armada nian
“Ita selebra soldadu sira, mane no feto, sargentu no ofisiál sira ne’ebé, iha pasadu no prezente, dedika ona sira-nia moris hodi defende ita-nia integridade territoriál no soberania nasionál,” Horta katak.
Tuir nia, FALINTIL, orijen husi Forsa Defeza Timor-Leste (F-FDTL) atuál, kontinua sai hanesan rezerva fundamentál ba liña frente hasoru ameasa interna no esterna.
“Ita moris iha mundu ida ne’ebé kompleksu no interligadu ba beibeik. Ameasa la-konvensionál sira mosu iha momentu hotu-hotu, husi risku teknolójiku to’o krime transnasionál, hanesan tráfiku kilat no narkótiku, krime sibernétiku, migrasaun ilegál no tráfiku umanu,” nia hateten.
Konflitu internasionál sira, hanesan iha Ukránia, Faixa Gaza, Iémen, Sudaun, liuliu iha Darfur, no funu iha Myanmar, ne’ebé kontinua ezije Timor-Leste nia atensaun.
Kontribuisaun no Parseria sira
“Ita-nia kolaborasaun ho nasaun belun sira, Austrália, Brazil, Xina, Estadus Unidus Amérika, Indonézia, Malázia, Nova Zelándia no Portugál, maka fundamentál ba dezenvolvimentu ita-nia kapasidade militár. Misaun Sosiál no Umanitária: F-FDTL dezempeña papél esensiál hodi mantein estabilidade no seguransa interna durante períodu sira dame nian,” Xefe Estadu tenik.
Servisu iha kolaborasaun besik ho forsa no servisu seguransa sira, F-FDTL fó nia apoiu ba PNTL hodi halo patrullamentu ba área risku sira, seguransa ba eventu importante sira no orden públika durante distúrbiu sivíl no deklarasaun kalamidade públika no estadu de-sítiu nian.
“Iha protesaun ba ita-nia fronteira sira, F-FDTL kolabora ho Unidade Patrullamentu Fronteira Polísia Nasionál Timor-Leste (PNTL), iha parseria besik ho TNI no servisu Intelijénsia Indonézia nian, hodi prevene ema ka sasán tama ilegál, ho kooperasaun regulár ida liuliu intensifikadu durante períodu krítiku sira,” Prezidente Horta alerta.
Lider nasionál ne’e sublin tan, iha situasaun dezastre naturál no emerjénsia sira, F-FDTL hala’o knaar krusiál hodi fó tulun no asisténsia umanitária, ne’ebé inklui distribuisaun ai-han, fornesimentu médiku, evakuasaun ba ema ne’ebé kanek no operasaun buka no salva.
Iha ambitu selebrasaun ne’e, Xefe Estadu-Maiór Jenerál FALINTIL-Forsa Defeza Timor-Leste (F-FDTL), Tenente-Jenerál Falur Rate Laek, reforsa tan katak, durante tinan barak nia laran, Timor-Leste hasoru momentu susar barak, maibé konsege ultrapasa situasaun oioin.
“Ita nia defensór sira, liuliu funu-na’in sira ne’ebé ho aten-barani, sempre hamriik hodi defende sira-nia rai no sira-nia povu ho sira-nia moris, ne’ebé hetan ona respeitu boot no ónra ba nafatin. Abilidade militár husi ita-nia komandante sira maka fatór krusiál ne’ebé kontribui ba ita-nia independénsia,” Falur dehan.
Nia dehan, iha batalla desiziva funu nian FALINTIL sira hatudu superioridade hosi sira nia estratéjia no tátika sira no hatudu ho brillante sira nia domíniu ba arte funu nian.
“Sira nia naran glorioza, proeza militár no tradisaun vitórioza sira sei hatutan husi jerasaun ba jerasaun. Tanba ne’e mak ohin ita halibur hamutuk iha eventu solene ida ne’e, ne’ebé selebra tinan-tinan hodi fó ónra ba sakrifísiu, sentidu patriótiku, korájen no aten-barani husi mane no feto FALINTIL, ne’ebé ho sira-nia raan rega fini ba ita-nia liberdade atu ita bele moris iha nasaun ida livre no independente,” Falur tenik.
Tuir nia, 20 agostu tinan ida ne’e, ema hotu agradese, atu garante katak sakrifísiu ne’ebé FALINTIL sira uluk halo ona hetan apresiasaun esternal, eroi no eroína sira-ne’e selu sakrifísiu ikus liu ba kauza ne’ebé boot liu sira-nia an rasik.
“Hodi fó onra no hahi’i sira-nia aten-barani, mane no feto sira-ne’e, hein katak iha prosesu konsolidasaun no dezenvolvimentu nasionál, ita-nia líder sira sei husik ba kotuk sira-nia diferensas, sira-nia ódiu no espíritu vingansa polítika,” tenik.
Nia mós alerta ba ema hotu atu hasa’e bandeira nobre inkluzaun, justisa, ekuidade, kondisaun hanesan, toleránsia no unidade nasionál.
Nasaun boot sira harii bainhira ema hotu-hotu iha liafuan atu koalia no hetan tratamentu hanesan iha planu boot nasaun nian.
“Rekonkista independénsia no libertasaun ita-nia rain, ita labele haluha temi prosesu rekonsiliasaun ne’ebé nu’udar mós rezultadu hosi dezenvolvimentu luta libertasaun nian, no planu ita-nia na’i-ulun sira-nian, sai realidade,” katak.
Nune’e ema hotu bele konsidera momentu dahuluk ka prosesu rekonsiliasaun nian, ne’ebé akontese iha nível internu, nasionál, entre timoroan hotu-hotu, iha komandu úniku luta nian, hetan orientasaun hosi lideransa superiór hosi sira ne’ebé iha responsabilidade boot atu halibur hamutuk no lidera esforsu hotu-hotu atu alkansa libertasaun rai-lulik, sira komprende no submete sira-nia interese pesoál no objetivu sira hodi favorese interese nasionál no patriótiku.
“Momentu ka prosesu daruak, ne’ebé hahú hosi líder polítiku nasionál sira, iha relasaun ho rekonsiliasaun ho sira ne’ebé, durante períodu okupasaun nian ne’ebé tinan naruk no todan, oho ita, halo opresaun no halo ita sai atan, maski nune`e sira nia asaun hotu, la konsege konkista ita-nia adezaun, nein submete ita-nia vontade,” Lider militar ne’e afirma.
Rekonsiliasaun ida-ne’e reflete ideia katak dalabarak la’ós povu mak responsável prinsipál ba asaun sira hosi sira nia nasaun nia líder polítiku sira, no mós ba sirkunstánsia sira ne’ebé lori ba eventu balun.
Maibé signifika mós katak respeitu idane’e tenke hetan retribuisaun, katak ita hotu hanesan iha komunidade nasaun sira-nia oin, katak Timor-Leste la’ós iha nivel diferente ka inferiór.
“Rekonsiliasaun la serve atu haluha, la serve tipu submisaun ruma, ida-ne’e afirmasaun ba ita-nia vontade di’ak, ita-nia sentimentu perdaun no umanizmu nian, ita-nia hakarak atu progresa iha kondisaun tratamentu hanesan, la hó kaer metin ba memória aat sira iha pasadu. Ida-ne’e mak loron atu selebra ita-nia unidade nasionál, kbiit ne’ebé sempre sai nu’udar baze ba ita-nia susesu hotu, hodi tau iha konsiderasaun katak Timor-Leste moris ho lema “Unidade, Asaun no Progresu,” Falur dehan tan.
Eis Gurileiru ne’e hatutan, lema Unidade Nasionál ida-ne’e nia okos mak sei harii futuru ne’ebé ema hotu hakarak, tanba la hó determinasaun, espíritu sakrifísiu no intelijénsia, mehi libertasaun nasionál povu timoroan nian sei la sai realidade.
“Ohin, legadu ne’e valoriza devidamente hosi jerasaun tuituir malu hosi foin-sa’e sira ne’ebé, tama iha F-FDTL, hetan inspirasaun hosi jerasaun FALINTIL ne’ebé ita hotu orgullu atu kontinua. Prinsípiu no valór sira F-FDTL nian haktuir husi kualidade Kombatente Libertasaun Nasionál nian, ne’ebé iha tinan ida ne’e ita selebra ho lema: Selebra loron 20 fulan Agostu mak komemora FALINTIL nia luta, ne`ebé la`ós diferente, maibe únika,” nia afirma.
Ne’e mak tempu reflesaun no tempu ba mudansa, Ida-ne’e signifika katak ema hotu louva no rekoñese katak Forsa Defeza Timor-Leste kontinua hakat tuir dalan ne’ebé antesesór sira ne`ebé la hamutuk ona ho balun ne’ebé nafatin ho orgullu serví iha instituisaun nobre no lulik ida-ne’e.
Jornalista: Hortencio Sanchez
Editór: Florencio Miranda Ximenes
