DILI, 20 agostu 2024 (TATOLI)–Universidade Católika Timorense (UCT) organiza semináriu nasionál ho tema “Vizita Apostólika de sua Satindade Papa Francisco a Timor-Leste” atu estudante no dosente sira prepara aan entermu koñesimentu espiritual no fiar-nian ba vizita amu Papa nian nu’udar susesór São Pedro nian.
“Tema loron ohin nian relasiona ho tema vizita Santu Padre ninian mai Timor-Leste “Atu imi-nia fiar sai imi-nia kultura”, entaun ida-ne’e topiku tolu lori husi oradór na’in-tolu ne’e ba estudante sira,” Oradór Vigariu Arkedioseze Metropolitana Dili, Pe. Graciano Santos Barros, hateten ba Agência Tatoli iha resintu UCT, Balide, tersa ne’e.
Tema dahuluk mak Primadu São Pedro no nia susesór ne’ebé signifika São Pedro mak Papa dahuluk apostolu ne’ebé hamrik iha oin, sai portavós no reprezentante apostolu sira seluk no ko’alia mós nia susesór sira seluk.
Iha tema daruak husi semináriu ko’alia kona-ba biografia no ensinamentu Papa Francisco nian ba estudante sira atu bele hatene jornada no Papa Francisco nia moris, no iha ne’e mós ko’alia uitoan mós dokumentu papal ba estudante no dosente sira.
Ikus liu, ko’alia mós kona-ba inkulturasaun fiar evanjelika iha kultura Timor nian atu estudante no dosente sira bele hatene kle’an kona-ba fiar mak kultura sarani nian.
Vigariu ne’e mós hateten iha ekipa kada dioseze ne’ebé hala’o mós formasaun ba sarani sira hotu hodi introdús kona-ba tema vizita Papa nian.
“Hakarak husu ba sarani sira hotu atu hakmatek no kria dame hodi bele partisipa máxima iha eventu ne’ebé mak mai ba iha misa Tasi-Tolu nian iha loron 10 setembru ne’e,” nia dehan.
Reprezentante estudante UCT, Abrão da Silva, sente orgullu nu’udar juventude timoroan bele simu informasaun no formasaun husi padre sira liuhosi semináriu ida-ne’e.
“Iha semináriu ne’e esplika diferensa entre kultura no fiar. Nu’udar estudante no sarani katólika sente orgullu iha okaziaun ida-ne’e,” nia hateten.
Nia dehan, prezensa Papa João Paulo II reforsa luta independénsia Timor-Leste no agora iha tan oportunidade ida Santu Padre Francisco nia vizita mai Timor-Leste ba daruak.
“Iha esperansa ba sarani katólika timorense, tanba iha nia supremu igreja universál nia bele mai vizita nia sarani sira. Iha esperansa katak sei hasoru malu ho Papa ne’ebé durante ne’e hein,” nia hateten.
Jornalista : Jesuína Xavier
Editór : Cancio Ximenes
