DILI, 21 agostu 2024 (TATOLI)–Membru Parlamentu Nasionál (PN), liuhusi Deputadu FRETILIN, Joaquim dos Santos “Boraluli’’, husu Governu presiza tau prioridade iha Orsamentu Jerál Estadu (OJE) kada tinan hodi aumenta rekursu umanu ba autór judisiáriu hanesan juís, prokuradór ho defensór públiku, tanba númeru rekursu umanu daudaun ne’e menus.
Notísia Relevante: Lucia Lobato husu Governu aponta osan ba FDCH atu loke bolsa ba jurista
“Tuir loloos Governu reforsa de’it sistema formasaun judisiáriu iha rai-laran, la presiza haruka universitáriu foun sira ba rai-li’ur bara-barak hodi gasta osan barak, núsa la investe iha fakuldade direitu no konvida dosente kualifikadu sira mai, ne’e despeza menus,” nia hateten ba jornalista sira iha resintu Parlamentu Nasionál, kuarta ne’e.
Tanba ne’e, nia sujere atu reforsa sistema formasaun iha universidade rai-laran ne’e iha kualidade di’ak hanesan fakuldade direitu Universidade Nasionál Timor-Lorosa’e (UNTL) no fakuldade direitu husi universidade sira seluk, reforsa sira hodi hamosu jurista kualidade hakarak rezolve menus rekursu umanu autór judisiáriu.
Deputadu membru komisaun A trata asuntu Justisa no Konstituisionál ne’e dehan, iha Lei Organizasaun Judisiária iha artigu ida ko’alia klaru hamosu justisa sira kualidade, entaun sistema ida-ne’e iha lei ne’e no estatutu majistradu ko’alia regula kondisaun atu hamosu juís, prokuradór, defensór sira liuhusi sentru formasaun.
Antes ne’e, iha 21 juñu 2024, Prezidente Parlamentu Nasionál (PPN), Maria Fernanda Lay, akompaña husi bankada parlamentár ho komisaun A ne’ebé trata asuntu Justisa no Konstituisionál, simu audiénsia husi Ekipa Traballu Reforma Justisa husi Governu hodi hato’o serbisu sira-ne’ebé hala’o ba órgaun soberania daruak ne’e.
Koordenadora Grupu Traballu Reforma Setór Justisa, Lucia Lobato, hateten iha problema boot Timor-Leste enfrenta iha setór justisa tuir analiza situasionál ne’ebé mak halo mak rekursu umanu, husi númeru kuantidade mós menus agora iha juíz ema na’in-28, produradór 34 no defensór públika 34 ba territóriu laran.
“Sa tan ita ko’alia kona-ba kualidade, se nia númeru kuantidade ki’ikoan ona ita atu ko’alia kualidade kontinua sai dezáfiu boot ba ita-nia Estadu, ne’e mak ita halo esforsu oinsá mak hasa’e kapasidade ba ita-nia juíz, prokuradór no defensór, agora daudaun ho programa espesializasaun ne’ebé sei halo besik mai liuhusi reforma justisa ba iha ita-nia sentru formasaun ne’ebé mak fó formasaun ba sira,” nia dehan.
Ida mak hahú rekruta joven timoroan sira-ne’ebé sira tenke tama iha universidade ho fakuldade direitu ida di’ak hodi bele forma sira bainhira sira fila mai karik balun interrese bele mai serbisu sai profisionál iha área justisa nian.
Jornalista : Nelson de Sousa
Editór : Cancio Ximenes
