DILI, 21 agostu 2024 (TATOLI)—Governu liuhusi reuniaun Konseluu Ministru (KM), kuarta ne’e, deside fó podér tomak ba Ministru Transporte no Komunikasaun, Miguel Marques Gonçalves Manetelu, hodi asina memorandu entendimentu ida entre Ministériu Transporte no komunikasaun Repúblika Demokrátika Timor-Leste no Ministériu Transporte Repúblika Indonézia, ho objetivu ba kooperasaun bilaterál.
Ministru Manetelu, hateten, akordu ne’e iha área espasu aéreu tanba Governu atu sertifika Aeroportu Rota do Sândalo, iha Rejiaun Administrativu Espesiál Oé-cusse Ambeno.
“Iha tinan kotuk ita iha plenu poder rua atu asina akordu maibé to’o iha ne’ebá ita só asina akordu ida de’it ho Ministru Komunikasaun Indonézia maibé ida ho Ministru Transporte Indonézia la konsege asina, entaun ha’u husu fali ba Konsellu Ministru atu fó poder mai ha’u atu ba asina iha tempu besik, tanba ita iha prosesu atu sertifika Aeroportu Rota do Sândalo ba aeroportu internasionál, ita tenke ko’alia ho Indonézia tanba espasu aero ne’e,” Governante ne’e informa hafoin reuniaun ezekutivu, iha Palásiu Governu.
Notísia relevante : Governu aprova proposta rezolusaun hodi estabelese akordu servisu aéreu rua
Ministru dehan, presiza ko’alia no asina akordu ho Indonézia molok sertifika Aaeroportu Rota do Sândalo ba internasionál tanba espasu Oé-cusse la akomoda.
“Ita tenke ko’alia duni ho Indonézia tanba espasu Oé-cusse ne’e kloot, tanba sorin ema nia tasi, sorin ema nia rai, iha lalehan mós ema nian, entaun aviaun kuandu tama sai tenke liu husi ema-nia espasu, ida-ne’e mak ita presiza koordena di’ak ho sira, ida-ne’e mak objetivu atu ba asina ne’e,” Ministru esplika.
Aeroportu Oé-cusse ho nia pista ida naruk metru 2.200 no luan metru 45, ho parajen asfaltadu ho metru 60 iha rohan ida-idak no zona seguransa adisionál (RESA) metru 90, aleinde ne’e, dalan ida ho luan metru 300 husi área protesaun nian.
Aeroportu Rota do Sândalo lokaliza iha enklave Oé-cusse, ne’ebé hanesan rai-lolon ida iha parte osidentál illa Timor nian.
Oé-cusse haketak husi Timor-Leste husi provínsia Indonézia, iha Nusa Tenggara Timur, iha sorin hotu-hotu exetu husi norte, ne’ebé nia fronteira ho Tasi Savu.
Jornalista : Hortencio Sanchez
Editora : Julia Chatarina
