Komunidade Macadique husu MAPPF hadi’a irrigasaun Luruboru no Buitau
VIQUEQUE, 21 agostu 2024 (TATOLI)- Komunidade iha suku Macadique, Postu Administrativu Uatulari, Munisípiu Viqueque, husu baMinistru Agrikultura, Pekuária, Peska no Floresta (MAPPF), atu hadi’a irrigasaun Luruboru no Buitau tanba tinan naruk ona natar purvolta ektare 200-resin abandona.
“Tempu uluk ami uza irrigasaun tradisionál hodi fornese bee ba natar, maibé agora bee husi mota aas ona, ami labele kee hodi fornese bee ba ami-nia natar sira-ne’e. Ami-nia natar iha área ne’ebá purvolta ektare 200-resin mak abandona tanba irrigasaun aat. Nune’e ami husu ministru ajuda ami agrikultór had’ia ami-nia irrigasaun atu ami bele halo natar no prodús hare”, Reprezentante Komunidade Agrikultura iha suku Macadique, Armindo Guterres, hateten ba jornalista sira, iha postu Uatulari, ohin.
Husu MAPPF buka dalan hodi rezolve problema ka hadi’a irrigasaun tanba rai pontensiál ka natar barak agora abandonadu.
“Ita rai poténsia ba natar barak, maibé seidauk funsiona prodús hare. Tanba ne’e maka ami rekomenda ba Governu liuliu MAPPF sebele hadi’a ami-nia irrigasaun ba tinan ida-ne’e. Atu nune’e ami hasa’e produsaun hare iha rai laran”, nia sujere.
Tuir dadús natar husi suku Macadique abandona maka hanesan área Luruboru ektare 100 resin, Safatula ektare 50 no Buitau ektare 50
Molok ne’e, Ministru Agrikultura, Pekuária, Peska no Floresta, Marcos da Cruz, afirma kona-bá infraestrutura liuliu hadi’a irrigasaun sai kestaun ida importante tanba tanba atu hasa’e produsaun agrikóla.
“Iha setór agrikultura ita-nia problema maka bee. Maibé, ita-nia politika kona-ba hasa’e produsuan ita sei tau konsiderasaun ba irrigasaun sira-ne’ebé aat hodi hadi’a, atu fornese bee ba natar. Importante mak ita servisu hamutuk hodi relata dadús natar nian nune’e bele hadi’a”, Ministru ne’e afirma.
Ministru ne’e dehan, komunidade sira-ne’ebé iha natar liu ektare 50, governu bele apoiu eskavatór, maibé komunidade sira tenke hamutuk ho extensionista sira hodi halo verifikasaun hodi apoia eskavatór atu hamoos sedimentasaun iha irrigasaun.
“Maibé, natar ektare 5 to’o 10 ita labele apoiu eskavatór, tanba ita sei gasta kombustivél. Maibé liuhusi númeru ne’e ita prontu apoia eskavadór. Maibé, kuandu ita apoia ona eskavatór tenke halo natar”, nia afirma.
Jornalista : Vitorino Lopes da Costa
Editór : Florencio Miranda Ximenes
