Top

Reprezentante povu husu tau atensaun ba kondisaun estrada iha Liquiça

Deputada Parlamentu Nasionál husi Bankada FRETILIN, Lídia Norberta dos Santos Martins. Imajen Tatoli/Francisco Sony

DILI, 21 agostu 2024 (TATOLI)—Reprezentante povu iha uma fukun Parlamentu Nasionál (PN) liuhusi Deputadu FRETILIN, Lidia Norberta, husu parte ezekutivu liuhusi entidade kompetente atu tau atensaun ba kondisaun estrada iha munisípiu Liquiça liuliu iha parte foho ne’e kondisaun ladi’ak.

“Hakarak ko’alia relasiona ho estrada no ponte balunliuliu ponte iha parte Liquiça nian ne’ebé mak ami foti beibeik ona, liuliu iha parte Liquiça foho nian. Postu administrativu tolu (3) ne’e agora nakfila ba haat no postu administrativu haat ne’e. Se ita haree iha Liquiça Vila tasi ibun ema hotu ba hanoin Liquiça ne’e di’ak maibé iha foho ne’e dalan subida até maluk balun husi parte leste nian ba mós hakfodak, tanba de’it dalan subida no nia kondisaun estrada ladi’ak,” nia levanta iha uma fukun Parlamentu Nasionál.

Tanba ne’e, nia husu Governu bele haree mak ezemplu husi estrada Metagou dalan di’ak ona maibé husi Metagou mai fali Lokulai no Darulete ba Asumanu ho tan Fatukesi parte sorin  Leotelaun ne’e mós problema.

“Bazartete nian foti ona mak dalan ne’e fui maibé kloot, agora iha suku Asumanu nian iha kompaña ida-ne’ebé mak halo estrada iha ne’eba mós halo kotu-kotu, entaun populasaun sira husu se bele haree kona-ba ida-ne’e. Nune’e, presiza tau atensaun ba kondisaun estrada hodi fasilita komunidade nia movimentu ba-mai,” nia hateten.

Deputadu CNRT, José Virgílio, rekomenda ba Ministériu Obra Públika (MOP) liuliu ba Institutu Jestaun Ekipamentu no Apoiu Dezenvolvimentu Infraestrutura Institutu Públiku (IGEADE, I.P) atu serbisu reforsa estrada parte postu Alas nian presiza hadi’a iha tempu badak fasilita nai-lulik no populasaun sira atu mai partisipa misa iha Tasi-Tolu ne’ebé sei prezide direta husi Santu Padre Papa Francisco.

Vise-Ministru ba asuntu Parlamentár, Aderito Hugo da Costa, rejista preokupasaun reabilitasaun estrada Liquiça ba maneira reabilitasaun sei envia ba Ministériu Obra Públika (MOP) atu tau atensaun.

Nune’e mós sei rejista estrada sira iha parte postu administrativu tolu iha Liquiça liuliu parte foho nian, hanoin tanba reabilitasaun estrada balun liuhusi projetu PNDS ne’e Prezidente Autoridade Munisípiu (PAM) mak halo jestaun, nune’e Ministériu Administrasaun Estatál (MAE) liuhusi PAM agora halo hela avaliasaun ba obra sira PNDS nian.

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!