BAUCAU, 21 agostu 2024 (TATOLI) – Sekretariadu Tékniku Administrasaun Eleitorál Munisípiu Baucau, hahú prepara eleisaun suku foun iha munisípiu referida.
Diretór STAE Munisípiu Baucau, Natividade Freitas Guterres, esplika, prosesu preparasaun iha ona faze rejistrasaun kartaun eleitorál foun ba komunidade husi suku tolu nu’udar rekizitu ba suku antes realiza eleisaun kada suku tanba rejista ona iha sistema suku nian.
“Tuir planu eleisaun sei realiza iha fulan-outubru, entaun ita iha tempu fulan ida-resin atu komunidade iha suku foun sira hetan hotu ona kartaun eleitorál hodi ezerse votu,” Diretór STAE Munisípiu Baucau hateten iha Vila Nova, kuarta ne’e.
STAE Baucau destaka ona ekipa tékniku iha terrenu hodi identifika sentru votasaun no koordena ho xefe suku atuál iha suku anteriór inklui koordenadór suku foun hodi informa ba komunidade atu hakbesik iha STAE atu muda kartaun eleitorál.
STAE mós planeia direita ba terrenu bazea ba jeografia hodi atualiza kartaun no halo resenseamentu eleitorál hanesan iha suku Werumata tanba distánsia no iha suku Builai bazea ba pedidu husi komunidade.
“Ita konsidera Caibada nu’udar área urbana nune’e atendimentu iha de’it edifísiu STAE, enkuantu suku rua seluk sei direita iha terrenu,” Natividade Freitas akresenta.
Natividade Freitas, argumenta, prosesu realizasaun eleisaun ba suku foun iha Baucau sei kontinua aplika tuir lei-númeru 09/2016 kona-ba lideransa suku ne’ebé hateten kada kandidatura xefe suku sei aprezenta kandidatura antes loron-15 molok eleisaun.
Suku foun ne’ebé atu eleisaun lideransa xefi suku inklui membru konsellu suku hamutuk tolu kompostu Builai no Caibada Makasae iha Postu Administrativu Baucau Vila no Werumata iha postu administrativu Laga.
Jornalista : Natalino Belo
Editór : Evaristo Soares Martins
