DILI, 22 agostu 2024 (TATOLI) – Komandu FALINTIL-Forsa Defeza Timor-Leste (F-FDTL), demite Primeiru Kabu Fernando Soares, tanba membru ne’e abandona feen ho nia oan sira hodi ba hola fali feto seluk.
Primeiru Kabu Fernando Soares abandona nia feen no oan kle’ur ona, tanba ne’e nia feen ba hato’o keixa dalabarak ona iha Kuartel Jerál F-FDTL hodi husu atu responsabiliza ba nia oan sira. Ho keixa ida-ne’e husi Komandu F-FDTL bolu bebeik Fernando Soares atu rezolve problema tuir família maibé nia lakohi koopera ho parte família no kontinua abandona nia feen ho oan sira.
Ho kazu ne’e, Komandu F-FDTL prosesa nia no konsidera nia hahalok ne’ebé hanaran infrasaun militár, iha kinta (22/8), ohin, liuhusi Xefe Estadu Maiór Jenerál F-FDTL, Domingos Raul Falur Rate Laek no Vise Xefe Estadu Maiór Jenerál F-FDTL, Calisto dos Santos ‘Coliati’ deside hodi demite Kabu Fernando Soares husi instituisaun F-FDTL.
Serimónia demisaun ne’e ho formatura jerál ne’ebé prezide hosi Komandante Unidade FALINTIL, Abel da Costa Xavier “NIKI” no iha okaziaun ne’e Komandante Unidade FALINTIL, Abel da Costa hasai boiña husi Primeiru Kabu Fernando Soares nu’udar jestu katak Fenando fila ona ba vida sívil, la’ós ona militár.
Abel da Costa Xavier “NIKI” iha nia intevensaun hateten, Unidade FALINTIL sente triste ba demisaun ne’ebé Komandu F-FDTL halo hasoru Primeiru Kabu Fernando Soares, demisaun ida-ne’e akontese tanba membru ne’e nia hahalok rasik.
“Kazu ne’ebé mak Primeiru Kabu Fernando Soares komete ne’e nu’udar problema privadu ne’e la’ós problema servisu nian. Kazu ninian mak halo nia mak sente. Problema privadu mak kuandu dada tama ona ba instituisaun, superiór sira konsidera ne’e sala tuir lei ne’e infrasaun militár. Tanba ne’e liuhusi despaisu husi ita-nia sua eselénsia Xefe Estadu Maiór Forsa Armada Vise Xefe Estadu Maiór F-FDTL reparasaun servisu Primeiru Kabu Fernando Soares husi instituisaun F-FDTL tanba ohin ita hasai boiña husi Primeiru Kabu Fernando Soares hodi nia ba fali vida sívil”, Abel da Costa Xavier hateten iha ámbitu formatura jerál ba demisaun Primeiru Kabu Fernando Soares ne’ebé hala’o iha baze Unidade FALINTIL Tasi-tolu, kinta ne’e.
Komandante Nicky husu ba membru Unidade FALINTIL sira katak kuandu iha problema ho família hanesan kazu Primeiru Kabu Fernando Soares nian, tenke informa ba komandu atu rezolve.
“Ita ne’e forsa espesiál, husu ba ita-bo’ot sira kuandu problema hanesan ne’e buka rezolve lalais, primeiru tenke rezolve iha interná ita-nian, ha’u hanesan Komandante Unidade Falintil tenke informa mai ha’u. Kuandu imi husik mak imi-nia família ba hato’o keixa uluk iha Kuartel Jenerál F-FDTL, ita labele halo buat ida “, nia afirma.
Nia dehan, kuandu membru militár ida enfrenta problema iha li’ur presiza koopera ho komandante sira atu bele ajuda hodi buka solusaun; labele nonok, labele dehan buat sira ne’e di’ak, to’o ikus mak rezultadu hanesan Primeiru Kabu Fernando Soares enfrenta.
Komandante ne’e husu ba militár husi Unidade FALINTIL atu kuidade ho infrasaun militár sira hanesan ne’e atu futuru labele akontese tán iha Unidade FALINTIL.
Primeiru Kabu Fernando Soares tama iha institusaun F-FDTL iha tinan-2011 no koloka iha Unidade FALINTIL.
Jornalista: Natalino Costa
Editór : Zezito Silva
