Komunidade Loi-Huno realiza jogu futeból komemora loron Konsulta Populár
VIQUEQUE, 22 agostu 2024 (TATOLI)- Komunidade iha suku Loi-Huno, postu Administrativu Ossu, munisípiu Viqueque inisiativa realiza jogu futeból entre aldeia hodi komemora loron Konsulta populár ba dala-25 (30 agostu 1999-30 agostu 2024).
Objetivu husi jogu futeból, atu promove talentu joven sira nian no komemora loron istóriku Konsulta Populár iha suku Loi-Huno.
Tuir Xefe suku Loi-Huno, Filomeno Guterres, katak, atividade jogu futeból ne’e inisíativa mai husi joven suku Loi-Hunu no inan amán sira hodi promove joven sira nian talentu futeból no liuhusi atividade desportiva ne’e atu anima komunidade sira iha ámbitu komemora loron Konsulta populár 30 agostu 1999.
“Ha’u agradese ba ha’u-nia juventude sira ne’ebé tau hanoin hamutuk hodi loke jogu futeból ida-ne’e. Atu hametin unidade no pás iha suku Loi-Huno laran. Tanba liuhusi eventu futeból ida-ne’e ita komemora ita-nia loron konsulta populár 30 agostu 1999, loron ne’ebé maka ita manán liberdade ba ukun rasik an. Nune’e loron ida-ne’e sai hanesan istória boot ba jerasaun foun sira hodi aproveita”, Filomeno Guterres, hateten ba jornalista sira, hafoin ramata abertura jogu futeból, iha bairru Buanurak, kinta lokraik (22/08).
Nune’e autoridade suku Loi-Huno ne’e dezafia joven Loi-Huno sira hodi hatudu talentu no mentalidade iha desportu, la bele hanoin problema iha kampu laran, atu nune’e hametin amizade ida-ne’ebé di’ak iha sosiadade nian leet.
Iha biban ne’e, Reprezentante Komadante Polísia Nasionál Timor Leste (PNTL) eskuadra Ossu, Primeiru Sarjentu Polísia, Elvino da Costa Guterres, husu joven sira hatudu amizade ne’ebé di’ak, labele hanoin problema durante jogu la’o iha kampu laran.
“Ha’u husu ita hotu nian kooperasaun hodi asegura ita-nia atividade jogu futeból ida-ne’e bele to’o ramata. Ita hamutuk hodi la’o ba oin hodi kontribui ba establidade”, nia apela
Entretantu, Prezidente Komisaun Organizadora, Marito da Costa, haktuir, inisiativa realiza eventu futeból hodi komemora loron konsulta populár atu anima komunidade no motiva joven sira hodi hasai sira nian talentu iha futeból.
“Nune’e ba realiza jogu amizade entre aldeia sira iha suku Loi-Huno ne’e hetan suporta másimu husi ita-nia komunidade sira no suporta mós empreza internsionál CRIG-COVEC loke kampu futeból hodi realiza jogu futeból ba komemora loron konsulta popular ne’e”, Marito realsa.
Nune’e jogu amizade ida-ne’e nia dehan, Asosiasaun Futebol Viqueque (AFV) apoia mós bola ida no árbitu ba komisaun organizadora hodi suporta ba atividade jogu amizade.
Enkuantu, jogu amizade ne’e hetan partisipa husi klube hamutuk sia kompostu husi Klube Kailaltulale, Calma, Roda Gila, Liawaioli, River Bank, Belesu A, Loi-Hunu Sentral, Belesu B no Sama liu, klube hirak ne’e mai husi lima maka hanesan aldeia Sama Liu, Ualauau, Kailatu Lale, Lia Uaioli no Uaieda.
Entretantu jogu amizade referida hahú abertura ho klube Kailatulale no klube Kalma no jogu ne’e sei ramata loron 30 fulan agostu.
Tuir obsevasaun jornalista Agência Tatoli nota iha serimónia abertura jogu amizade ba komemorasaun loron konsultas populár ne’e komunidade suku Loi-Huno no joven antusiazmu asiste jogu futeból ne’ebé la’o iha sira nian suku laran.
Iha abertura jogu amizade ne’e hetan partisipa husi autoridade lokál, seguransa no prezidente alAsosiasaun Futeból Munisípiu Viqueque.
Jornalista : Vitorino Lopes da Costa
Editór : Florencio Miranda Ximenes
