DILI, 22 agostu 2024 (TATOLI) – Ministru Defeza Kontra Almirante Donanciano do Rosario Gomes Pedro ‘Klamar Fuik’ akompaña husi Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul Falur Rate Laek, simu vizita husi na’in ba Empreza Damen Michiel Hendrikx hodi diskute planu ba konstrusaun Ró Navál.
Ministru Defeza Pedro Klamar Fuik, hateten desde iha 2018, Empreza Damen hato’o ona protidaun hakarak servisu hamutuk ho Governu Timor-Leste atu konstrui Ró Navál ba militár Timor-Leste no empreza ne’e mai hasoru ona Primeiru-Ministru Xanana Gusmão.
“Ohin ne’e ami hasoru malu atu rona de’it sira-nia aprezentasaun kona-ba Ró Navál ne’ebé durante empreza ne’e prodús no sira atualiza kona-ba rekezitu operasionál balun ba ró sira ne’ebé empreza ne’e prodús. Empreza ne’e husi Holanda, fábrika ba ró”, Klamar Fuik dehan.
Governante ne’e, haktuir enkontru ne’e Empreza Damen hakarak konstrui Ró Navál ho mentru 70 ho kapasidade bele tula sasan 1.400 kilograma no akomula forsa marineiru 30.
“Ró ida-ne’e bele para iha tasi klaran durante loron 30 no bele halo kontrolu ba ita-nia tasi mane no ohin iha diskusaun, ami husu ró ne’e bele serve uza multi-funsaun para bele apoiu iha situasaun ida dezastre naturál karik ema mout iha tasi nian bele halo intervensaun”, nia adianta.
Klamar Fuik hateten, konstrusaun ró ba Komponente Navál ne’e tenke tuir ita-nia kondisaun ekonómia no geofráfika.
“Tuir planu, ita sei iha duni ró ida ba Komponente Naval, ne’e prioritáriu, lei programasaun militár hateten tenke hola ró ba Komponente Navál no orsamentu ba akizisaun ró ba Komponente Navál mós iha ona lei programasaun militár. Maibé hanesan ha’u antes ita atu hola ró ita tenke halo uluk Portu”, nia afirma.
Kona-ba portu, nia espera katak tinan ne’e bele konklui ona dezeñu ba Portu Navál no tinan oin ita avansa ho konstrusaun Portu Navál.
“Se lae, ita laiha portu, ró ne’e atu mai para iha ne’ebé, tanba ne’e portu tenke di’ak mak ita foin hola ró. Ita-nia portu kuandu iha ona kondisaun ita kria ona ita sosa ró”, nia dehan.
Jornalista: Natalino Costa
Editór : Zezito Silva
