Sentru Saúde Ossú rejista moras ISPA-diárea 4.000-resin
VIQUEQUE, 22 agostu 2024 (TATOLI)-Xefe sentru saúde Ossú, munisípiu Viqueque, Azevedo da Cruz Amaral, informa, hahú husi fulan Janeiru to’o fulan Agostu, Sentru Saúde Ossu rejista kazu moras Infesaun Respiratóriu Aguda (ISPA) no kazu diárea hamutuk rihun haat-resin.
“Kazu moras ne’ebé ami rejista hahú husi fulan Janeiru to’o agora ne’e moras ISPA no diárea maka númeru aas. Kazu moras ne’e sa’e tanba kauza husi ita-nia klíma rai manas no rai rahun hodi implika ba moras ISPA no diárea”, Azevedo da Cruz Amaral, hateten ba Agência Tatoli, ohin.
Tuir dadús moras ISPA ne’ebé rejista iha sentru saúde Ossu purvolta rihun tolu no moras diárea rihun ida resin ne’ebé komunidade sira halo tratementu iha sentru saúde Ossú.
“Bainhira ita-nia komunidade hetan moras sira mai iha fasilidade saúde ami fó tratamentu no fahe ai-moruk ita-nia komunidade konsumu. Alende ami fahe ai-moruk, ami mós halo promosaun saúde ba ita-nia komunidade sira hodi halo prevensaun ba moras ISPA, diárea no moras seluk. Daudaun ne’e ami halo atividade promasaun saúde bá eskola sira no aldeia sira hodi fó hanoin ba komunidade atu halo prevensaun ba moras hotu ne’ebé rejista iha sentru saúde”, nia relata.
Kona-ba stock out ai-moruk nia dehan, agora stock ai-moruk báziku ne’ebé iha sentru saúde sei sufisente hodi halo atendimentu ba komunidade sira husi postu Ossú.
Tuir dadús, pesoal saúde ne’ebé destaka iha sentru saúde Ossu hamutuk nain-57, kompostu hosi médiku, enfremeiru, parteira, faarmsista, inklui seguransa no limpeza. Hosi postu administrativu Ossu, suku hamutuk 10 no aldeia 63, ho total abitante 17.021.
Jornalista : Vitorino Lopes da Costa
Editór : Florencio Miranda Ximenes
