Top

CCI-TL no parseiru fó apoiu finanseiru-materiál ba igreja katólika

Prezidente CCI-TL, Jorge Manuel de Araujo Serano entrega simbólikamente osan ba Arsebispu Arkidioseze Metropolitana Dili, Dom Virgílio Kardeál do Carmo da Silva, ba apoiu atividade vizita Papa Francisco, iha Konferénsia Episkopál Timorense, Bidau-Lecidere, sesta (23/08/2024). Imajen Tatoli/António Daciparu

DILI, 23 agostu 2024 (TATOLI)–Kámara Komérsiu Indústria Timor-Leste (CCI-TL, sigla portugés) hamutuk ho membru asosiasaun no setór privadu sira entrega apoiu finanseiru no materiál ba igreja katólika liuhusi Arkidioseze Metropolitana Dili hodi halo preparasaun simu vizita Papa Francisco mai Timor-Leste iha loron 09 to’o 11 setembru.

Montante osan ne’ebé atribui hamutuk $214.940, ne’ebé disponibiliza ba transporte no nesesidade bázika hanesan foos tonelada 20, supermie inklui materiál ijiene.

Setór privadu sira mos sei prepara menu ba ema 1.000, ne’ebé nu’udar apoiu adisionál la inklui apoiu finanseiru no sasán sira seluk.

“CCI-TL mai entrega ba Sua Eminénsia ne’e apoiu husi setór privadu sira, husi membru asosiasaun no onoráriu inklui setór privadu sira ne’ebé  mak fó tulun husi CCI-TL, ho objetivu atu hatudu partisipasaun setór privadu katak ami mós iha responsabilidade ba vizita Sua Santidade. Ita kontribui buat ne’ebé iha, entaun partisipasaun ne’e iha oin rua no finanseira,” Prezidente Asosiasaun Emprezariál Feto Timor-Leste, Hergui Luina Fernandes Alves, informa iha sede Konferénsia  Episkopál Timorense, Bidau-Lecidere.

Notísia relevante : Santu Padre vizita TL: Grupu artezenatu pinta imajen Papa Francisco iha parede

Nia dehan, apoiu ida-ne’e atu hakma’an serbisu ba preparasaun Santu Padre nian no partisipasaun ativa ba eventu vizitasaun ne’e.

Iha biban hanesan, Arsebispu Arkidioseze Metropolitana Dili, Dom Virgílio Kardeál do Carmo da Silva, agradese ba apoiu ne’e hodi halo preparasaun simu vizita pastorál Amu Papa.

“Apoiu ida-ne’e la’ós doasaun, maibé ne’e partisipasaun,” Kardeál afirma.

Jornalista     : Jesuína Xavier

Editora          : Julia Chatarina

Publisidade

Leave a Reply

Latest Post

error: Content is protected !!