DILI, 23 agostu 2024 (TATOLI) – Governu hili ona edifísiu Ministériu Transporte no Komunikasaun (MTK) atu sai hanesan Sentru Mídia Nasionál bainhira Papa Francisco vizita Timor-Leste.
Diretór Nasionál Infraestrutura no Komunikasaun iha MTK, Ambrosio Amaral, dehan Sekretariadu Altu Nivel Komisaun Instituusionál foti desizaun diretamente katak fatin MTK mak sai sentru hodi fasilita mídia nasionál durante vizita Amu Papa.
“Ida-ne’e desizaun husi komisaun katak sei fasilita ita-nia media nasionál, sira ne’ebé hakarak halo servisu diretamente no iha ne’e mós ita hetan apoiu husi Fornesedór Servisu Internet (ISP) GARDAMOR, ida ne’ebé prontu atu fasilita konetividade internet ho kapasidade ida ho 200Mbps, klaru katak ida ne’e sei ajuda tebes”, Ambrosio hateten ba TATOLI iha nia eskritóriu MTK Caicoli, ohin.
Nia relata, MTK no TIC Timor sei fornese website espesiál hodi foti sai transmisaun direta husi RTTL (Radio Televisão Timor-Leste) ka GMN TV no bele uza husi mídia nasionál.
“Ami mós deside ona atu aloka 500Mbps iha Sentru Mídia Internasionál hodi fasilita jornalista liu 890 iha Otél Hilton no 200Mbps iha Aeroportu Internasionál Nicolau Lobato”, nia haktuir.
Nia esplika, Mb baibain uza hodi sukat velosidade transferénsia dadus, hanesan velosidade internet, ne’ebé espresa iha megabit kada segundu (Mbps). Ida-ne’e hatudu dadus hira maka bele transfere iha segundu ida. Ezemplu; se ligasaun internet iha velosidade 200 Mbps, ida-ne’e signifika katak utilizadór bele download arkivu ida ho 25MB (megabyte) iha segundu ida-nia laran.
Operadór telekomunikasaun na’in-tolu sei tulun DNIK hodi hasa’e kapasidade internet iha pontu oioin hanesan Telkomcel iha Igreja Katedrál Maria Imaculada da Conceição no ALMA, Timor Telecom sei tulun iha Nunsiatura Apostólika no Komisaun Altu Nivel Sekretariadu, Telemor sei tulun iha Palásiu Prezidensiál no CCD (Sentru Konvensaun Dili).
“Ami seidauk informadu kona-ba kapasidade internet ne’ebé sei aloka, maibé sira komprometidu atu fó apoiu, aleinde ne’e, iha Tasi-tolu ami mós hamutuk ho Governu, ISP no ami-nia operadór sira”, nia dehan.
Nia rekoñese katak Governu nia kapasidade internet oras ne’e daudaun atinje de’it 1Gb (gigabit) nune’e apoiu husi ISP no operadór telekomunikasaun sira durante vizita Papa Francisco nian sei fasilita tebes utilizasaun konetividade internet iha rai laran.
Jornalista : Felicidade Ximenes
Editór : Zezito Silva
