VIQUEQUE, 24 agostu 2024 (TATOLI)- Prezidente Repúblika (PR), José Ramos-Horta, Sábadu ne’e, apoia nesesidade báziku ba labarik sira iha orfanatu iha Madre Fransciscana, suku Caraubalo, Postu Viqueque Vila, munisípiu Viqueque.
Tuir Xefe Casa Civil, Jesuína Maria Ferreira Gomes, esplika, ekipa Casa Civil ne’ebé hetan delegasaun hosi Xefe Estadu, José Ramos-Horta, mai vizita bá Orfanatu Madre Franciscana hodi distribui nesesidade bázika bázeia ba pedidu ne’ebé hato’o ba PR tuir labarik sira-nia nesesidade loron-loron nian hanesan, foos, mina, sapatu, pasta no seluk tán.
“Prezidente delega ha’u ho ekipa hodi mai fó apoiu nesesidade ba madre sira bazeia ba madre sira-nia pedidu ne’ebé husu apoia ai-han, pasta no nesesidade sira seluk tan”, Xefe Casa Civil, Jesuína Maria Ferreira Gomes, hateten ba jornalista sira, iha, Madre Franciscano, Beloi, ohin.
Ekipa husi PR sei kontinua distribui mós nesesidade bázika ba komunidade iha suku Ossu de Cima, Postu Administrativu Ossu, Ossu Suku Uma Uain-Craik, Uatulari ho Uatucarbau nomós apoia ekipamentu desportivu ba joven sira, tuir proposta ba iha Gabinete PR.
Iha fatin seluk, Xefe suku Ossu de Cima, Celestino M. de Carbalho, agradese tebes ba ekipa Prezidente Repúblika ne’ebé fó apoia nesesidade báziku ba família vuneravél iha suku Ossu de Cima hamutuk 160.
“Ha’u husu agradese ba Prezidente Repúblika ne’ebé apoiu ona nesesidade báziku ba ha’u-nia komunidade sira. Antes ha’u maka hato’o pedidu ba Prezidente Repúblika, nune’e, horseik (sesta) ekipa to’o iha ha’u-nia suku hodi apoia nesesidade báziku kompostu husi foos, manu-tolu, mina no apoia sira-ne’e ha’u-nia komunidade hamutuk uma-kain 160 mak simu hotu ona nesesidade báziku husi PR”. Nia akresenta.
Entretantu, PAM Viqueque, Francisco Cruz S. de Gonzaga Soares, mós agradese ba ekipa delegasaun PR sira-nia vizita iha Viqeuque hodi fó tulun komunidade liuhusi programa umanitáriu no parte autoridade sei organiza diresaun asuntu sosiál hodi haree asuntu nesesidade bázika Orfanatu nian.
“Ha’u husu agradese ba ekipa PR ne’ebé oferese apoia nesesidade báziku ba komunidade munisípiu Viqueque. Ho apoia sira-ne’e atu hakma’an ita-nia komunidade sira iha munisípiu ida-ne’e”. nia hato’o.
Tuir dadús Orfanatu Madre Franciscana totál hamutuk na’in-40 husi idade labarik to’o joven ne’ebé dadauk ne’e hala’o estudu iha nivél infantil to’o Ensinu Sekundáriu.
Jornalista : Vitorino Lopes da Costa
Editór : Florencio Miranda Ximenes
