DILI, 26 agostu 2024 (TATOLI) – Komemorasaun Aniversáriu Konsulta Populár 30 Agostu 1999 nian ba dala-25, sei hala’o iha Timor-Leste laran tomak, ho prezensa husi membru Governu iha kada postu administrativu nasionál.
“Data istórika ida-ne’e, marka momentu desizivu ida-ne’ebé fundamentál iha istória Timor-Leste nian, sei realiza ho eventu lubun ida husi loron 28 to’o 30 fulan-agostu tinan 2024, ne’ebé envolve líder nasionais no internasionais, nune’e mós partisipasaun ativa husi populasaun,” tenik iha portál Governu ne’ebé Agência TATOLI asesu, ohin.
Komemorasaun aniversáriu Konsulta Populár ba tinan ida-ne’e ho tema prinsipál, “Povu maka Luta! Povu maka Terus! Povu maka Manán Funu! Povu mak Eroi ba Ukun-rasik an!”, selebrasaun tinan ida-ne’e destaka papél importante tebes ba povu timoroan nian luta ba ukun-rasik aan.
Tuir oráriu ne’ebé fó sai ona katak, Dili, selebrasaun prinsipál sira sei hala’o iha Estádiu Munisipál Dili no sei inklui mós sesaun solene ida iha Parlamentu Nasionál.
Espozisaun iha Arkivu no Muzeu Rezisténsia Timorense no jantár ofisiál ida iha Palásiu Nobre Lahane.
Eventu ne’e sei sura ho prezensa husi figura internasionál ne’ebé inklui atuál no antigu xefe Estadu no Governu, aleinde governante no figura importante sira seluk, inklui Sekretáriu-jerál Nasaun Unida.
Festividade ne’e sei inklui atividade lubun ida, hanesan konsertu, marxa, aprezentasaun kulturál no diskursu ofisiál sira, hodi selebra reziliénsia no vitória povu timoroan nian.
Governu Timor-Leste konvida sidadaun hotu-hotu atu partisipa ho ativu iha selebrasaun sira-ne’e, ne’ebé hanesan testemuñu espíritu rezisténsia, sakrifísiu no vitória povu timoroan nian.
Jornalista: Hortencio Sanchez
Editór: Rafael Ximenes de A. Belo
