DILI, 26 Agostu 2024 (TATOLI) – Vise-Primeiru-Ministru no Ministru Dezenvolvimentu Rurál no Abitasaun Komunitária, Mariano ‘Assanami’ Sabino, husu ba Ministru Agrikultura, Pekuária, Peska no Floresta, Marcos da Cruz, atu fó espasu, iha kada semana, ba to’os-na’in sira hodi rona sira-nia lamentasaun sira.
Assanami sujere ida ne’e bainhira halo abertura ba feira ne’ebé realiza husi Ministériu Agrikultura, Pekuária, Peska no Floresta (MAPPF) hodi komemora Loron Konsulta Populár ba da-25, iha 30 Agostu ne’e.
“Tenke halo ministériu ne’e sai fatin ida atu hasoru malu ho povu agrikultór sira iha kada semana hodi rona sira-nia halerik no sira-nia preokupasaun ba serbisu agrikultura nian. Ha’u hakarak dehan ba imi hotu inklui Ministru Agrikultura katak fatin ida ne’e, bainhira ha’u sei asume pasta nu’udar ministru, ha’u halo nia modelu la hanesan agora ne’e. Fatin ne’e ha’u halo atu kada sesta-feira bele hasoru malu ho agrikultór sira”, governante ne’e hato’o iha Comoro.
Assanami rekoñese katak MAPPF daudaun mós halo ona esforsu lubuk ida atu hasa’e produsaun iha rai-laran, liuliu halo irrigasaun no kria bee-matan foun iha foho-leten sira hodi bele fornese bee ba natar sira.
Aleinde ne’e, nia dehan estensionista sira kontinua serbisu maka’as hodi apoia agrikultór sira hodi kuda sira-nia produtu tuir siénsia modernu no tulun sira atu uza ekipamentu ne’ebé ministériu prepara ona.
Iha sorin seluk, Ministru Agrikultura, Pekuária, Peska no Floresta, Marcos da Cruz, hateten nia parte mós tau nafatin preokupasaun ba agrikultór sira no nia rasik iha programa ida ne’ebé sempre realiza iha nia mandatu, ne’ebé kada semana sempre tun bá baze hodi hasoru malu ho to’os-na’in sira hodi rona sira-nia preokupasaun.
“Ha’u mós la tuur nonook iha fatin. Ha’u sempre tun nafatin ba povu sira iha área rurál no área remota sira ne’ebé nia rai poténsia ba natar no to’os hodi rona sira-ninia preokupasaun, nune’e bele ajuda hodi hatuur planu no programa tuir duni nesesidade iha baze”, dehan.
Relasiona ho feira ne’ebé MAPPF organiza, Marcos da Cruz dehan atu promove produtu lokál sira ne’ebé durante ne’e agrikultór sira kuda iha natar no to’os.
Feira ne’e realiza durante loron tolu, husi 26 to’o 28 Agostu, ho nia tema sentrál “Hamutuk ho povu agrikultór iha kompromisu hodi hasa’e produsaun agrikultura, pekuária, peska no floresta, atu asegura soberania ai-han iha Timor-Leste”.
Atividade ne’ebé realiza iha feira ne’e maka halo kompetisaun kulinária, halai karon no tata kanuru uza berlindes ba labarik sira no dada tali feto no mane.
Jornalista: Tomé Amado
Editora: Maria Auxiliadora
