Autoridade Viqueque husu adisionál miliaun $4-resin
VIQUEQUE, 26 agostu 2024 (TATOLI)- Autoridade Munisípiu Viqueque husu adisionál miliaun 4,640.171.00, iha Komisaun Revizaun Orsamentu tinan 2025, tanba tetu orsamentu ne’ebé fó ba ho montante miliaun $7,302.510.00.
“Iha orsamentu tetu fiskál ne’ebé ami simu miliaun $7. Maibé iha proposta adisionál ita husu aumenta ba miliaun $4,6. Ita espera adisionál miliaun $4,6 hetan aprovasaun, nune’e responde ba programa sira-ne’ebé ami trasa ona iha munisípiu Viqueque”, Prezidente Autoridade Munisípiu Viqueque, Francisco Cruz S. de Gonzaga Soares, hateten ba jornalista sira, iha resintu munisipál, ohin.
PAM Viqueque ne’e dehan, orsamentu adisionál ne’e atu benfísia ba programa sira-ne’ebé autoridade planea ona hanesan kapitál menór, kapitál dezenvolvimentu hodi responde nesesidade munisípiu Viqueque.
“Iha orsamentu adisionál ba iha orsamentu transferénsia públika ita tau mós programa merenda eskolár, konstrusaun eskolár, subsídiu ba xefe suku sira no Programa Nasionál Dezenvolvimentu (PNDS) no mós orsamentu ba kapitál menór. Orsamentu sira-ne’e, nesesita ba munisípiu ninia nesesidade no orsamentu ida-ne’e munisípiu presiza tebe-tebes”, nia akresenta.
Hanesan daudaun nia dehan, iha munisípiu Viqueque transporte hela karreta ida maka kondisaun di’ak no karreta sira seluk kondisaun aat presiza halo manutesan, entaun liuhusi orsamentu adisionál ne’e maka bele ajuda.
“Tanba ne’e, orsamentu adisionál $4,6 ne’e bele hetan aprovasaun hodi rezolve problema munisípiu Viqueque nian. Se karik orsamentu adsionál hetan aprovasaun sei difikulta programa merenda eskolár iha fulan tolu mai. Proposta adisionál pelumenus responde ba ami-nia preokupasaun sira-ne’e. Tetu orsamentu ne’e ami alokadu hotu ona tuir nesesidade munisípál no nesesidade povu munisípiu Viqueque nian. Tan ne’e ita tenke asegura hodi pasa proposta sira-ne’e”. tenik nia.
Jornalista : Vitorino Lopes da Costa
Editór : Florencio Miranda Ximenes
