Delegasaun Vatikanu konkorda ho preparasaun obra fízika ba vizita Papa Francisco
DILI, 26 agostu 2024 (TATOLI)–Ekipa avansadu husi Vatikanu halo inspesaun ikus no konkorada ho preparasaun obra fízika fatin identifikadu ba vizita pastorál Papa Francisco.
Amu Papa sei halo vizita pastorál iha fatin tolu hanesan Sentru Konvensaun Dili (CCD, sigla portugés) iha loron 11 setembru, Rezidénsia Madre Asosiasi Lembaga Misionari Awam (ALMA) no Tasi-tolu ba selebrasaun misa Solene iha loron 10 setembru.
“Delegasaun Vatikanu nian to’o iha ne’e hala’o ona funsaun iha fatin sira hotu, hahú husi Katedrál to’o CCD, Rezidénsia Madre ALMA, Ospitál no iha fatin ne’e (Tasi-tolu). Maioria buat hotu ne’ebé ita prepara ne’e sira kontente, hateten pozitivu, tanba ita halo ho másimu,” Vise-Koordenadór ba vizita Amu Papa husi igreja no atuál Pároku Motael, Padre Guilhermino da Silva, hateten ba jornalista sira iha Tasi-tolu, segunda ne’e.
Ekipa delegasaun Vatikanu rekomenda atu halo separasaun haris fatin entre delegasaun no Amu Papa.
“Tenke iha rede ba sakristia no haris fatin ba Papa ho delegasaun Papa nian atu amululik ka ema ruma halai ba hasai foto ka kaer liman ho Papa. Ekipa sira ne’e iha esperiénsia iha nasaun seluk, entaun lakohi atu akontese iha Timor-Leste,” nia akresenta.
Notísia relevante : Delegasaun Vatikanu halo inspesaun ba viatura ne’ebé sei tula Papa Francisco no ekipa
Aleinde ne’e, iha kadeira espesífiku tolu ba Amu Papa iha Tasi-tolu, CCD no Palásiu ne’ebé halo iha Indonézia.
Ekipa mós halo vizita bá Horpital Nacional Guido Valadares hodi haree fatin ba Very Important Person (VIP) no Ambulánsia.
Iha sorin seluk, Vise-Koordenadór ba vizita Amu Papa husi Governu no atuál Ministru Administrasaun Estatál (MAE), Tomás do Rosário Cabral, hateten, ekipa delegasaun Vatikanu rekomenda de’it iha Tasi-tolu atu tau tapeta mean iha altar oin no tau rede iha uma sakristia iha Altár kotuk.
“Fatin kotuk sira ne’e prontu hotu ona, sira husu tau rede de’it, tau tan koradaun iha Altár oin. Ein prinsípiu buat hotu tuir rekomensaun ne’ebé sira hato’o mai. Ida-ne’e finál ba sira-nia inspesaun, aban sira prepara relatóriu no aprezenta iha Konsellu Ministru,” Vise-Koordenadór tenik.
Aleinde ne’e, ekipa Vatikanu husu iha fatin Madre ALMA sira presiza prepara di’ak ba labarik sira iha ne’ebá hetan bensaun husi Santu Padre.
“Iha fatin CCD di’ak no Rezidénsia ALMA di’ak no bele dehan 100%, ne’e duni totál prepara fízika ne’e liu 90% ona, hela ordena resintu Tasi-tolu no movimentu ema-nia ba haris fatin tau arrekada atu kontrola no monta sound mikrofone iha Tasi-tolu,” nia katak.
Ministru garante Governu Austrália mós apoiu tanke 60 no fura bee iha fatin tolu iha Tasi-tolu atu fornese bee ba haris fatin sira.
Jornalista : Jesuína Xavier
Editora : Julia Chatarina
