EUA hakarak apoia dezenvolve talentu juventude iha Timor-Leste
DILI, 26 agostu 2024 (TATOLI) – Embaixadora Estadu Unidu Amérika (EUA) iha Timor-Leste,Donna Ann Welton, segunda ne’e, hasoru malu ho Ministru Juventude, Desportu, Arte no Kultura (MJDAK), Nelyo Isaac Sarmento hodi ko’alia kona-ba iha futuru apoia dezenvolvimentu juventude iha Timor-Leste.
“Embaixadora Estadu Unidus nian mai hasoru ha’u ami ko’alia liu kona-ba joven sira iha Timor-Leste, Embaixadora promete iha futuru nasaun rua tenke iha kooperasaun di’ak oinsá hamutuk ho Governu dezenvolve joven sira nia talentu,” Ministru Nelyo hateten hafoin remata enkontru.
Ministru ne’e dehan, Timor-Leste ho nia populasaun maioria joven. Tanba ne’e kooperasaun ho EUA hodi dezenvolve talentu juventude sira nian ne’e importante tebes.
“Ha’u hatete ba sira katak, nasaun ne’e maioria ho joven, ne’ebé dezenvolvimentu ba talentu joven sira nian importante tebes. Ida ne’e ita atu haree joven sira ne’ebé iha hanoin di’ak, mentál di’ak no espiritu foun atu tane nasaun ne’e ba oin, ita presiza duni tulun husi Estadu Unidu Amérika nian,” Ministru ne’e tenik.
Governante ne’e sublina, bainhira EUA iha futuru selebra ona akordu ho MJDAK sei tau prioridade ba formasaun ba joven sira iha área lideransa, edukasaun sivika no seluk tan atu aumenta foinsa’e sira nia koñesimentu.
Iha okaziaun ne’e, Embaixadora Donna Ann Welton, hateten ko’alia kle’an ho Ministru Nelyo Isaac oinsá atu dezenvolve joven sira nia talentu iha área desportu no formasaun.
“Ha’u ho Ministru ami ko’alia kle’an kona-ba interese joven sira nian. Estadu Unidu hanesan parseiru di’ak ho Timor-Leste, nune’e ba oin ita haree oinsá halo akordu ruma ba dezenvolvimentu talentu juventude sira nian iha área desportu no formasaun atu hase’e kapasidade joven sira nian iha área oioin,” Embaixadora kompromete.
Jornalista: Hortencio Sanchez
Editór: Florencio Miranda Ximenes
