DILI, 26 agostu 2024 (TATOLI) – Reprezentante Nasaun Unidas (UN) iha Timor-Leste, Funmi Balogun, reune ho Vise Primeiru Ministru no Ministru Koordenadór ba asuntu Ekonómiku Ministru Turizmu no Ambiente hodi diskute kona-ba apoiu ONU ba futuru dezenvolvimentu Timor-Leste.
“Ohin ha’u enkontru ho Vise Primeiru Ministru no Ministru Koordenadór ba asuntu Ekonómiku, Ministru Turizmu no Ambiente, Francisco Kalbuadi Lay kona-ba ONU sei apoiu dezenvolvimentu Timor-Leste nian iha setor hotu”, Funmi Balogun, informa ba jornalista sira iha Farol, ohin.
Nia dehan, enkontru ne’e mós diskute kona-ba loron referendu Timor-Leste nian ba dala 25.
“Iha referendu ne’e ita hanoin hikas kona-ba tinan 25 saida mak ita halo, ba oin ita bele servisu hamutuk di’ak liután ho Governu Timor-Leste, liuliu iha Governu ida-ne’e nian. Entaun ohin ita koalia espesífiku liu kona-ba ai-han, kolaborasaun ba transformasaun ai-han nian, iha edukasaun, saúde, finansiamentu no mós oportunidade ba investimentu, oinsá mak ita bele lori setór privadu sira ba hasa’e kualidade investimentu iha lideransa ida-ne’e nian”, nia relata.
Nia esplika, Sekretáriu Jerál ONU sei vizita Timor-Leste hodi partisipa iha aniversáriu referendum ba dala-25, ida-ne’e hatudu katak ONU servisu hamutuk di’ak liután ho Estadu Timor-Leste.
Iha fatin hanesan, Vise Primeiru Ministru no Ministru Koordenadór ba asuntu Ekonómiku, Ministru Turizmu no Ambiente, Francisco Kalbuadi Lay, hateten reprezentante Nasaun Unidas nian iha Timor leste mai iha ne’e hodi diskute kona-ba dezenvolviementu Timor-Leste nian ba futuru.
“Ita hatene katak nasaun unidas, hahú iha 1999 sira hala’o sira-nia kna’ar ajuda ita, entaun ita hetan ukun aan, sira kontinua ajuda ita no ohin iha oportunidade hodi simu reprezenatnte Nasaun Unidas nian kona-ba dezenvolvimentu ita-nian iha futuru,” nia konklui.
Jornalista : Felicidade Ximenes
Editór : Zezito Silva
