EDTL-Protesaun Sívil presiza tesi ai ne’ebé afeta ba fiu eletrisidade

DILI, 27 agostu 2024 (TATOLI)—Membru Parlamentu Nasionál (PN) liuhusi Deputadu CNRT, José Virgílio, husu ba Eletrisidade Timor-Leste, Empreza Públika (EDTL, E.P) ho Autoridade Protesaun Sívil atu tesi-ai sira-ne’ebé afeta ba fiu eletrisidade iha sidade Dili no munisípiu sira.
“Ahí mate ne’e, iha parte balun mós ita tenke haree. Ttanba, iha munisípiu balun mós bainhira ita la’o ba estrada, haree ai-hun boot kuaze naruk liu ona fiu. Entaun, husu ba parte EDTL presiza haree hodi koordena ho parte protesaun sívil hodi tesi ai refere, nune’e iha tempu udan no anin karik labele fó impaktu,” nia hateten ba jornalista sira iha resintu Parlamentu Nasionál, tersa ne’e.
Nia hateten, dalaruma nia akompaña ahí mate iha kapitál Dili ne’e iha área balun maibé parte EDTL hato’o avizu duni, tanba fó tempu ba tékniku sira hadi’a trafo ho konetór sira-ne’ebé kondisaun kle’ur ona presiza troka.
“Ahí mate la hanesan uluk ona maibé agora mate dalaruma de’it. Governu iha planu tinan lima atu haree kona-ba jomunidade nia preokupasaun kona-ba ahí mate-lakan, entaun agora EDTL kontinua hadi’a trafo no konetór sira-ne’e,” nia dehan.
Deputadu PD, Manuel Noronha, hala’o observasaun iha área Sarlala ba to’o Aileu nian ne’e, hatudu katak iha ai-hun boot lubun ida iha estrada ibun aas liu tiha ho fiu no ai-riin eletrisidade nian, entaun husu EDTL, E.P ho protesaun sívil atu tesi hodi prevene ahí mate-lakan iha tempu udan no anin boot.
Antes ne’e, mós Deputadu KHUNTO, António Verdiál de Sousa, preokupa ho ikus-ikus ne’e ahí sempre mate lakan ho oras barak nia laran, nune’e EDTL, E.P presiza tau atensaun tanba la kleur tan Sua Santidade Papa Francisco hala’o vizita pastorál mai Timor-Leste, nune’e presiza iha preparasaun di’ak hodi ahí labele mate.
Jornalista : Nelson de Sousa
Editór : Cancio Ximenes

