DILI, 27 agostu 2024 (TATOLI) – Juventude rezisténsia mai hosi partidu polítiku oioin no organizasaun oioin hahú halibur malu iha filleira ida de’it ho naran ‘Amizade Rezisténsia’ atu hateke ba futuru Timor-Leste liuliu atu buka solusaun oinsá halibur líder nasionál sira hamutuk hodi lori dezenvolvimentu ba povu tomak.
“Ami hamutuk mai husi joven rezisténsia, ami mai husi partidu keta-ketak, organizasaun keta-ketak, maibé ami nia objetivu atu tau hanoin hamutuk oinsá haree ba futuru nasaun ida ne’e nian. Durante tinan barak ami la hamutuk kuaze vizaun atu la hanesan tiha, maibé ami halibur malu fali, ami tenta atu junta persepsaun hotu-hotu atu kontribui ba ita-nia dezenvolvimentu nasaun nian iha tinan-25 mai oin,” Koordenadór Amizade Rezisténsia, João da Silva ‘Choque’ hateten liuhosi konferénsia Imprensa ne’ebé realiza iha Bemori Dili, tersa ne’e.
Nia dehan, atu haree ba futuru nasaun Timor-Leste nian iha tinan-25 Konsulta Populár ne’e, Amizade Rezisténsia halo reflesaun hodi realiza semi-semináriu ida iha loron 30 fulan-agostu iha Metiaut Dili tuku 16:00 to’o remata.
“Hala’o reflesaun ba tinan-25 referendum ida ne’e konvida malu rezisténsia sira hotu ne’ebé idade ho ha’u hanesan, balu liu ha’u ita atu partisipa hotu iha semináriu ne’e, atu ita hanoin hamutuk durante tinan-25 ita hetan independénsia ida-ne’e, semináriu ne’e ita la’o ho tema prinsipál mak hanesan ‘Hametin Unidade, Amizade no Fraternidade Juventude Rezisténsia Hodi Hateke ba Timor-Leste Horseik, Ohin no Futuru’,” Choque tenik.
Semi-semináriu ne’e sei hala’o atividade prinsipál rua ida mak sei iha oradór importante na’in-lima hanesan, Instituisaun; Virgilio Guterres, Provedór Direitu Umanu no Justisa (PDHJ-sigla portugés), José Luis Oliveira husi Organizasaun Naun Governamentál (NGO), António da Conceição “Kalohan” Deputadu Parlamentu Nasionál, Padre Juvito do Rego parte igreja no José Chan husi akademista. Atividade dala-rua mak oinsá juventude rezisténsia sira atu ko’alia ba malu hodi haree ba futuru Timor-Leste nian.
“Oradór na’in-lima ne’e sei ko’alia atu haree situasaun Timor-Leste agora ba oin, ida fali ami atu utiliza oportunidade ne’e para ami bele ko’alia ba malu atu haree hamutuk, buka meiu ida atu muda ita hotu nia hanoin katak ita labele mantein ho situasaun ida agora ne’e. Partidu hotu kuandu manán kaer ukun labele hanoin mak responde ba malu de’it la haree ba dezenvolvimentu, depois koloka ema la tuir nia dalan, ida ne’e mak ita hamutuk atu ko’alia ba buat sira ne’e,” nia tenik.
Tuir nia, atividade ne’e atu fanun ema hotu katak responsabilidade ba dezenvolvimentu nasaun la’ós Governu nian de’it maibé parte hotu nia responsabilidade.
“Ita hotu hamutuk atu foti pasu foun ida, katak partidu se de’it mak kaer ukun, kuandu halo buat los ita dehan los, kuandu halo buat lalos ita dehan lalos. Nune’e tinan 25 mai oin ita bele halo mudansa total ba ita-nia nasaun sai di’ak hanesan rai seluk,” nia afirma.
João da Silva ‘Choque’ apela, “Ba rezisténsia maluk sira hotu iha ne’ebé de’it, atu iha FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL), tantu iha Funsionariu Públiku, atu halo to’os no natar, ami konvida imi ho respeita 30 Agostu lorokraik bele asiste seminariu ne’ebé ami organiza bele mai direita ou liuhusi media sosiál, momentu di’ak ba ita atu ko’alia ba malu mak ida-ne’e, atu nune’e grupu ida ami realiza agora ne’e bele forte atu ajuda ita hotu iha rai ne’e.”
‘Choque’ hatutan, bainhira Governu halo rekonsiliasaun tenke la’o ho justisa atu nune’e bele justu ba ema hotu. Organizasaun ne’e nia objetivu atu ejize ba Estadu atu buka tuir funu-na’in sira ne’ebé mate iha funu laran atu tau iha fatin ne’ebé dignu atu nasaun ne’e bele la’o ba oin ho di’ak.
Joven rezisténsia ne’e afirma, dadaun ne’e unidade nasionál komesa mihis ba bebeik, ho nune’e organizasaun rezisténsia ne’e hamrik atu suku fila fali unidade nasionál entre líder antigu sira ho líderansa foun sira.
Iha fatin hanesan, juventude rezisténsia ne’ebé hanesan membru iha Amizade Rezisténsia Francisco David Carlos ‘Abono’ hateten, atividade ne’ebé Amizade Rezisténsia hala’o hanesan reflesaun ida ba Timor-Leste agora no futuru iha tinan-25 referendum Timor-Leste nian.
“Ami-nia objetivu ne’e atu halo reflesaun ida ba prezente, futuru no pasadu. Ami juventude rezisténsia ne’ebé la haree ba kór partidu dezde uluk kedan halibur malu. Ami-nia haree durante tinan-25 nia laran ita seidauk iha identidade koletiva atu hatur loloos poder Estadu no interrese nasionál. Ami lakohi buat sira ne’e atu tranzmite fali ba jerasaun sira tuir mai,” Abono tenik.
Tuir nia, juventude pasadu no juventude agora diferente tebes maibé nu’udar juventude rezisténsia lakohi atu fó sala ba juventude ohin loron tanba fatór ekonomia, sosiál mak transforma sira-nia karákter radikál hodi ‘destroi’ situasaun.
“Ita labele fó sala ba joven sira agora ne’e, sira adapta ba situasaun, Governu mak tenke iha polítika ne’ebé di’ak hodi trata ita-nia joven sira,” nia fó hanoin.
Tanba ne’e, nia husu ba Governu atu labele politiza instituisaun Estadu, tenke utiliza ema nia kapasidade ne’ebé matenek hodi kaer ukun atu hadia povu nia moris.
Nia afirma tan katak, lakoi haree jerasaun tuan sira nia hahalok odiu no vingansa polítika hodi fó oportunidade ba ema ne’ebé iha tempu pasadu atu hamnasa iha juventude rezisténsia nia sofrimentu.
“Ita-nia aman sira tenke unidu, atu nune’e ema seluk labele hamnasa iha ami nia sofrimentu nia leten, liuliu ema sira ne’ebé uluk lakoi ukun aan,” nia afirma.
Alende ne’e juventude rezisténsia Francisco dos Santos husi partidu Congresso Nacional Reconstrução de Timor (CNRT) reforsa, unidade nasionál atu hamriik metin iha nasaun ne’e parte hotu labele haree ba kór partidu no seluk tan.
“Uluk ami-nia tempu sei joven, kaer malu metin la haree ba kór arte marsiál no seluk tan, ne’e-duni agora mós hanesan atu lori ita-nia nasaun ne’e ba oin labele haree tan ba kór partidu, arte marsiál no seluktan, ita-nia nasaun ne’e presiza ema hotu nia kontribuisaun ne’ebé di’ak lori nasaun ne’e ba oin,” Francisco relembra.
Iha sikun seluk, joven rezisténsia hanesan mós espoza husi Nando Gulit, Adelia Fernandes Gulit reforsa tan katak, liberdade ne’ebé Timor-Leste iha la’ós simu hosi bandeza ho nune’e ukun-na’in sira tenke ukun povu ho loloos atu nune’e labele halo povu terus bebeik hanesan iha funu laran.
“Ami husu ba ukun na’in sira, ita-nia ukun aan ida ne’e la’ós entrega husi bandeza, ukun na’in sira tenke konsidera netik ema ne’ebé uluk luta ba ukun rasik aan ne’e. Ita agora kompleta ona tinan 25 ukun rasik aan ninian, maibé maun-boot sira barak seidauk konsidera ema ne’ebé uluk luta ne’e liuliu joven rezisténsia sira. Sira dalabarak simu liu fali ema ne’ebé uluk lakohi ukun aan. Ida-ne’e hanesan mensajen ida hato’o ba maun sira bele rekoñese netik ami-nia sakrifísiu iha tempu pasadu, labele haree de’it ema ne’ebé lakohi ukun aan ne’e mak di’ak ami sira ne’e tau ba kotuk,” nia fó hanoin.
Nune’e juventude rezisténsia husi Partidu Demokratiku (PD), Lito Rambo, husu ba líder nasionál hotu katak rezultadu luta ba libertasaun ne’e liuhusi luta koletivu ida.
“Ami hato’o ami-nia mensajen ba ita-nia líder sira hotu katak luta ba ukun aan ida ne’e liuhosi luta koletivu ida. Partidu polítiku hanesan instrumentu ida atu utiliza ba interrese nasionál ba povu tomak no Estadu nian. Ida-ne’e mak mensajen jerál ida husi ami juventude rezisténsia ba aman nasaun sira katak, tempu ona ba imi atu haketak imi-nia ego polítika ne’e atu haree ba Estadu nia di’ak,” Lito Rambo hakotu.
Jornalista: Hortencio Sanchez
Editór: Rafael Ximenes de A. Belo
