Konsulta Populár ba da-25: CO25 realiza espozisaun iha postu administrativu sira

DILI, 26 agostu 2024 (TATOLI)-Komité Orientadór 25 (CO25, sigla portugés) realiza atividade espozisaun fotográfia, loké filme no halo reflesaun iha postu administrativu sira iha territóriu, hahú husi 27 to’o 29 agostu 2024, hodi komemora loron Konsulta Populár ba da-25 (30 agostu 1999-30 agostu 2024).
Notisia Relevante: CO25 hetan fundu rihun $160 hodi realiza festa populár iha postu administrativu
“Komité hetan fiar husi Primeiru-Ministru (PM), Kaya Rala Xanana Gusmão, hodi bele hala’o atividade iha postu administrativu sira iha territóriu laran iha ámbitu komemorasaun loron Konsulta Populár 30 agostu. Nune’e, komité hahú nia atividade durante loron tolu. Hahú 27-29 agostu iha kada postu administrativu iha territóriu,” Prezidente Komité orientadór 25, Constâncio Pinto “Terus” hateten liuhusi programa “Entervista Eskluziva’’ ho tema “Reflesaun ne’e.
Tema prinsipál ne’ebé komité hamutuk ho populasaun sira hodi komemora loron istóriku ne’e mak “Atu haree ba pasadu, prezente no futuru’’, nune’e atividade espesífiku ne’ebé komité hala’o mak espozisaun fotográfia ne’ebé sei aprezenta atividade ne’ebé hala’o iha loron konsulta populár nian de’it iha momentu ne’eba, inklui loké filme resistir e vencer ne’e mós kona-ba iha momentu referendu ninian.
Atividade ida seluk mak sei halo diskusaun hodi halo reflesaun atu haree de’it populasaun ninia reasaun ba iha loron istóriku ida-ne’e.
Dahuluk, sei haree uluk ba iha momentu ne’eba votasaun saida mak akontese ho dezáfiu ne’ebé populasaun sira enfrenta, entaun lori fali povu ba kotuk uitoan esperíensia sira pasada nian.
Ida-ne’e, importante tebes ba timoroan sira atu hanoin nafatin memoria pasada nian, atu nune’e halo timoroan sira forsa liután no bele konstrui prezente forte.
“Kona-ba sira-nia haree ba benefísiu sira saida mak sira hetan ona iha independénsia, no atualmente saida mak sira hanoin haree, tantu pozitivu no negativu ho mós husu sira-nia hanoin ka sujestaun ba futuru nasaun ida-ne’e sai oinsá,” nia dehan.
Komité Orientadór 25 ninia papél mak hakerek istória reziténsia, nune’e hafoin atividade ne’e ikus komité sei halo nia relatóriu ba Governu aspirasaun povu nian, nune’e mós rona populasaun sira-nia esperiénsia aspeitu istóriku mai komité bele dezenvolve hodi bele halo investigasaun kle’an ba períodu ne’ebé povu selebra ba iha volume ida atu hakerek kona-ba akontesimentu istóriku iha períodu konsulta populár ne’e rasik.
“Tanba iha momentu 30 agostu 1999, kulminante ba ita-nia rezisténsia tomak no povu deside loloos vida nasaun nian atu konstrui Estadu direitu demokrátiku,” nia hateten.
Enkuantu, Komité hetan apoiu orsamentu rihun $160 husi Ministériu Administrasaun Estatál (MAE) hodi realiza atividade sira-ne’e no kada postu administrativu aloka rihun $3.000.
Komité koordena ona autoridade lokál no postu sira atu bele garante seguransa ba komunidade nian, nune’e komunidade bele festeza ho seguransa no liverdade másimu.
Jornalista : Nelson de Sousa
Editór : Cancio Ximenes

