PNTL Baucau sei reforsa seguransa iha nasionál

BAUCAU, 27 agostu 2024 (TATOLI) – Membru Polísia Nasionál Timor-Leste (PNTL) Munisípiu Baucau sei apoia seguransa iha nasionál relasiona ho vizita Papa Francisco iha Timor-Leste.

Komandante PNTL Munisípiu Baucau, Superintendente Xefe Antoninho Mauluta, esplika, apoia seguransa referida bazea ba orientasaun hosi Kuartél Jerál PNTL nasionál ne’ebé sei apoia liuhosi akompaña peregrinu hahú loron viajen hanesan to’o iha fatin akampamentu Hera, kontinua ba Rotunda Prezidente Nicolau Lobato, Komoro no sei termina ho la’o-ain to’o iha portaun entrada.

“Ita pasa hela informasaun ba ita-nia sarani-sira tomak sasán ne’ebé presiza mak lori, tanba pasa mak hetan fali halo servisu ne’e tarde oituan,” Komandante PNTL Munisípiu Baucau hateten iha Vila Nova, tersa ne’e.

Totál membru ne’ebé sei akompaña viajen hamutuk na’in-15 ne’ebé sei utiliza karreta rua no tuir planu sei remata no akompaña peregrinu-sira to’o hikas fali iha munisípiu Baucau hafoin misa solena Papa Francisco iha Tasi-Tolu, Dili.

Tuir planu, membru sira-ne’ebé apoia seguransa ba peregrinu sira sei halo pasa revista ba motorista hanesan prevene telefone bainhira viajen ba Dili.

“Ami-nia membru sira-ne’ebé atu akompanha direita peregrinu-sira, tuir orientasaun hosi komandu iha ne’ebá na’in-15 ,” Superintendente Xefe Mauluta akresenta.

Komando PNTL nasionál fo-sai oreintasaun atu PNTL Baucau dezloka membru hamutuk na’in-50 hodi reforsa seguransa iha nasionál durante vizita Papa Francisco iha Timor-Leste.

Jornalista   : Natalino Belo

Editór         : Evaristo Soares Martins