Ameasa uma-kain 500, abitante Loi-Hunu husu MOP konstrui morru protesaun iha mota Buanurak
VIQUEQUE, 28 agostu 2024 (TATOLI)-Komunidade suku Lui-Huno, Postu Administrativu Ossu, munisípiu Viqueque, Filomeno da Costa Guterres, husu Ministériu Obra Públika (MOP) atu konstrui morru protesaun ba mota Buanurak ne’ebé fó ameasa ba komunidade sira-nia uma hamutuk 500-resin.
“Ami suku Loi-Hunu aldeia tolu hanesan Lawaliu, Samaliu no aldeia Waieda ho totál uma-kain 587, ho totál populasaun 4.000-resin ne’ebé maka hela iha área Buanurak hakarak husu Governu liuhusi MOP halo netik morru protesaun ba mota Buanurak hodi asegura ami-nia uma no kampu futeból”, Filomeno da Costa Guterres, hateten ba jornalista sira, iha Buanurak, ohin.
Filomeno afirma, komunidade hato’o ona pedidu ba MOP, maibé seidauk rona rezultadu bainhira loos maka ministériu halo levantamentu ba mota Buanurak ne’ebé agora besik ona komunidade sira-nia uma.
“Iha tinan kotuk ba komunidade sira afeta ona inundasaun no iha momentu ne’eba mate isin ida rai hela uma maka mosu inundasaun mate isin ami kesi de’it ba ai-rin. Ho ida-ne’e maka hakarak husu Governu sentrál tau ba atensaun”. Nia hato’o.
Iha fatin hanesan, Xefe suku Loi-Honu, Filomeno Guterres, hateten mota Buanurak sai risku ba komunidade sira-nia uma liuliu iha tempu udan mota tun hodi afeta ba komunidade.
“Nune’e, foin lalais ha’u hamutuk empreza lokál ami ba hatama ona pedidu ba MOP hodi konstrui morru protesaun ba mota ninia. Tanba husi mota bá komunidade hela kuaje metry lima , foin lalais ekipa MOP mai hasoru ha’u foti ona dadús, maibé ita hein de’it ninia prosesu tenderizasaun ba mota Buanurak”, nia lamenta.
Jornalista : Vitorino Lopes da Costa
Editór : Florencio Miranda Ximenes
