DILI, 28 Agostu 2024 (TATOLI) – Primeiru-Ministru, Kay Rala Xanana Gusmão, hasoru malu, ohin, ho eis-Reprezentante Sekretáriu-Jerál Organizasaun Nasaun Unida (ONU), Sukehiro Hasegawa. Durante enkontru, líder husi Japaun ne’e louva Timor-Leste no rekoñese país ne’e sai ezemplu ba mundu liuhusi nia demokrasia.
“Timor-Leste nia demokrasia sai ezemplu ba nasaun hotu iha mundu, tanba imi-nia Governu ukun troka malu, maibé la mosu konflitu, sempre iha pás. Ida ne’e sai ezemplu di’ak ba nasaun sira iha mundu bele banati tuir”, Sukehiro Hasegawa afirma iha Palásiu Governu, Dili, hafoin reuniaun.
Profesór ne’e dehan, difikuldade ne’ebé Timor-Leste hasoru daudaun ne’e mak hanesan uluk Japaun enfrenta, tanba ema barak halai husi munisípiu bá hotu iha kapitál Tokyo hodi buka serbisu.
“Ema sira iha foho halai hotu mai sidade hodi buka serbisu iha Tokyo, hanesan agora ema sira iha munisípiu halai hotu mai Dili. Maibé, ho lideransa ne’ebé iha bele fó solusaun ba difikuldade hirak ne’e”, nia espera.
Sukehiro sujere ba Governu loke portu traballu iha munisípiu
Ba kestaun ne’e, Sukehiro sujere atu rezolve difikuldade ne’ebé país hasoru mak Governu tenke iha ona planu atu dezenvolve no loke postu traballu iha munisípiu hotu, nune’e bele lori fila sidadaun sira bá idaidak nia fatin.
Tuir nia, Timor-Leste atinje mudansa ida ne’ebé di’ak ho lideransa Primeiru-Ministru, Kay Rala Xanana Gusmão, hanesan mós eis-Prezidente Repúblika.
Sukehiro Hasegawa sujere ba Timor-Leste atu dezenvolve aan di’ak liu-tán iha parte infraestrutura, la’ós de’it iha Dili maibé mós iha área rurál sira.
Nia mós kontente tanba Timor-Leste nu’udár membru ONU nian no haruka ona militár F-FDTL hodi partisipa iha Peacekeeping Force no espera katak país ne’e bele partisipa mós iha atividade sira seluk ONU nian.
Sukehiro Hasegawa nu’udár akadémiku, edukadór, autór no administradór japonés. Serbí hanesan Reprezentante Espesial Sekretáriu-Jerál Nasaun Unida ba Timor-Leste no Xefe Misaun Manutensaun no Konsolidasaun Pás nian, UNMISET, UNOTIL no UNMIT, hahú hosi Maiu 2004 to’o Setembru 2006.
Notísia relevante: Sukehiro no Bendito Freitas diskute kontribuisaun Timor-Leste ba pás iha mundu
Jornalista: Hortencio Sanchez
Editora: Maria Auxiliadora
