DILI, 28 agostu (TATOLI)–Koordenadór liturjia ba misa solene Amu Papa nian iha Tasi-Tolu, Pe. Justino Tanec, hateten ekipa organizadora hili ona lista ba ema-ne’ebé atu lee leitura, salmonista no orasaun universál.
Saserdote esplika iha misa solene iha tasi Tolu-Tolu ne’e distribui ba iha kada munisipiu mak hili membru ativu sira iha igreja no hetan aprovasaun husi Konferensia Episkopal Timorense (CET).
“Iha misa solene Tasi-Tolu nian ne’e sei iha leitura ida de’it mak responsável husi dioseze Maliana no leitór mak Zeferino Soares dos Santos. Salmo ne’e sei kanta husi salmista Domingas Soares Maia Tavares ne’ebé pertense ba iha Grupu koru parokia Balide nian,” Koordenador ba misa liturjia Amu Papa nian iha Tasi-Tolu, Pe. Justino Tanec, hateten ba Agência Tatoli, iha Tasi-Tolu.
Nia hateten, Evanjellu sei lee husi diákonu José Araújo, ne’ebé agora servisu hela iha parokia Remexiu, munisipiu Aileu.
Nia esplika, omilia sei halo duni iha lian español no sei iha tradusaun ba iha lian Tetun husi padre Joaquim Sarmentu husi kongregasaun Jesuita.
“Lian español ho portugés ne’e atu hanesan, entaun hili ida-ne’e atu Papa labele sente kole halo esforsu no amu Joaquim Sarmentu sai tradutór,” nia dehan.
Iha orasaun dos fieis, nia dehan, sei lee dialetu neen (6) tanba tuir maioria komunidade ko’alia, ne’eduni leitór sira husi dioseze tolu mak hanesan tuir mai ne’e; Mambae se lee husi Fabrizia dos Santos Exposto; Baiqueno lee husi Francisco Miguel Martins husi dioseze Dili, Bunak lee husi Imaculada Maria Luisa da Costa Pereira; Fataluku lee husi Lourenço Fernandes; Galolen lee husu Januário Natalino Soares da Silva no Makasae lee husi Ruben Bosco dos Santos husi dioseze Baucau.
“Iha leitura ida de’it no iha evanjellu, ida lee leitura husi dioseze Maliana, ami hasoru malu ona hodi bele integra aan iha komisaun hodi hala’a kna’ar. Buát sira-ne’e hotu iha rekoñesimentu Kardeál no sinodál ba ida-idak nia servisu hodi prepara di’ak ba amu Papa nia vizita,” nia dehan.
Nia esplika, lee orasaun universal ne’e ekipa komisaun hili de’it neen, tanba iha lian materna liu 30 iha munispiu hotu-hotu, entaun hili lian materna reprezentativu de’it.
Jornalista : Jesuína Xavier
Editór : Cancio Ximenes
