DILI, 28 agostu 2024 (TATOLI)–Kongresista husi Sindikatu Marítima Enerjia no Transporte Timor-Leste (SMET-TL) hili Simplicio Marcos Ximenes sai prezidente foun SMET-TL ba període 2024 to’o 2028.
Eleisaun ne’e feitu liuhusi kongresu estraordináriu loron rua ho tema “Transformasaun SMET-TL iha era foun: hametin prinsipiu hodi luta ba interrese membru hotu nian”, halo revizaun ba estatutu, determina kuota membru sira-nian, diskute problema traballadór no defini planu tinan haat ba oin.
Prezidente foun SMET-TL, Simplicio Marcos Ximenes, hateten sira iha palnu prioridade ne’ebé refleta ba iha serbisu no ezijensia traballadór sira-nian.
“Ami-nia planu prioridade mak rekolla baze dadus ida kona-ba membru sira-ne’ebé namkari ona no hato’o preukupasaun traballadór sira-nian ba empregadór sira no ministériu relevante sira,” Prezidente foun SMET-TL, Simplicio Marcos Ximenes, hateten ba Agência Tatoli, hafoin eleitu sai prezidente, iha Mandarin.
Simplicio Marcos Ximenes mós reforsa iha nia mandatu sei defende direitu traballadór sira-nian iha setór maritima, enerjia, transporte kona-ba direitu oras serbisu no saláriu mínimu, tanba setór sira-ne’e iha servisu ida-ne’ebé enfrenta risku.
“Setor marítima no enrjia ne’e hanesan área ida-ne’ebé risku tebes ba traballadór sira, tanba ne’e mak organizasaun hakarak defende traballador sira-nia direitu atu labele hetan risku,” nia esplika.
Nia hateten, SMET-TL mós sei aproxima ho empreza sira atu ko’alia serbisu sira empregadu sira halo atu bele fó konsiderasaun iha saláriu sira.
Prezidente ne’e hateten, SMET-TL iha membru atuál hamutuk ema 100 ne’ebé hamahan aan iha organizasaun ne’e.
Jornalista : Jesuína Xavier
Editór : Cancio Ximenes
