VIQUEQUE, 29 agostu 2024 (TATOLI)- Autoridade munisípiu Viqueque, kinta ne’e, realiza atividade desportu ho marsa saudavél ne’ebé envolve husi autoridade, veteranu, funsionáriu no estudante sira hodi refleta ba loron 30 agostu 1999.
Objetivu marsa ne’e hakarak halo promosaun ida iha komunidade katak desportu ne’e hadi’a ema-nia saúde no komemora loron konsulta populár ba dala-25.
“Ita realiza hodi halo komemorasaun ba loron konsulta populár ba tinan 25. Ohin loron ita hetan ukun rasik an tanba ita hetan grasa husi Maromak nian ne’ebé fó oportunidade ba ita timor-oan hotu hodi hili ukun rasik an.
Tan ne’e, husi atividade sira-ne’e la’o ho saúdavel hodi hanoin fila-fali tempu pasadu liuba ita-nia povu hasoru iha momentu ba ezerse sira diretu votu iha sentru votasaun sira”, Prezidente Autoridade Munisípiu Viqueque, Francisco Cruz S. de Gonzaga Soares, hateten iha abertura marsa saudavél, iha resintu munisipál, ohin.
PAM Viqueque dehan, povu Timor Leste komemora loron konsulta populár 30 agostu ne’e halo marsa saudavél atu la’o hodi hanoin ikas pasadu liuba no jerasaun foun sira bele sente.
Iha fatin hanesan, Komadante Polísia Nasionál Timor Leste (PNTL), Superintendente, Antó nio Rego Fernandes, hateten, selebra loron konsulta populár joven balun maka ladun hatene tanba balun moris 1999 liu ba.
“Tanba ne’e ita sira-ne’ebé autór ba partisipa eleisaun tinan 25 liu ba ida-idak halo ninia istória hodi hatutan ba ita-nia jerasaun foun sira. Ita labele lembra de’it ema ko’alia, se ita depende ba ema konta, bainhira tempu to’o mate tiha. Entaun istória lakon tanba ne’e ita presiza hakerek. Komemorasaun ida-ne’e ita tenke hamutuk hodi lori ita-nia rai ba oin”, nia realsa.
Tuir observasaun jornalista Agência Tatoli nota katak iha marsa saudavél ne’e hetan partisipa direta hosi PAM Viqueque ho nia espoza, komadante PNTL munisípiu Viqueque no partisipa masimu husi funsionáriu, estudante, Diretór Munisípal, Diretór Teritoriál, servisu saúde no PNTL kuaze 200-resin no akompaña kantigu loron to’o ona no akompaña dram band husi estudante sira.
Entretantu, atividade marsa saúdavel ne’e hahú tuku 07:00 dader rute hahú husi resintu munisipál Viqueque to’o kampu futeból postu Viqueque purvolta kilométru ida resin.
Jornalista : Vitorino Lopes da Costa
Editór : Florencio Miranda Ximenes
