DILI, 29 agostu 2024 (TATOLI)–Bispu Dioseze Maliana no Prezidente Konferénsia Episkopál Timorense (CET, sigla portugés), Dom Norberto Amaral, konsidera loron Konsulta Populár (30 agostu 1999) hanesan kakuluk harii uma ida.
“Loron Konsulta Populár hanesan kakuluk ida ne’ebé ita harii uma ida hanesan riin sira ne’e hotu sa’e mai leten taka ho kakuluk, entaun hanesan mós ho Konsulta Populár ne’ebé mak povu determina nia-an rasik hodi tuu ho pregu ne’e, ita hodi ukun-an korre-an husi operasaun domíniu Indonézia ho kolonializmu nian to’o sai independénsia mak ida-ne’e,” Bispu Dioseze Maliana hateten iha salaun Institutu Superiór Filozofia no Teolojia (ISFIT), Fatumeta, kinta ne’e.
Notísia relevante : Konsulta populár 30 agostu 1999 mak determina ukun rasik aan
Iha kontestu ukun-an, Dom Norberto hato’o parabéns ba povu Timor-Leste ne’ebé mak brani hatudu matenek no serbisu hodi hala’o moris ho di’ak.
“Embora iha buat balun ne’ebé ladún di’ak maibé hakarak ka lakohi ita la’o ho ida-ne’e, ita nia pasu neneik bele la’o tuir buat ne’ebé mak ita mehi. Atu halo dala-ida de’it difísil maibé halo fazeadamente ne’e mak ita presiza tau iha ita-nia neon ho laran atu sai ita hotu nia di’ak hodi bele kontrui ita-nia nasaun ho di’ak,” nia akresenta.
Iha ámbitu komemorasaun loron Konsulta Populár ba dala-25 ne’e, Bispu Dioseze Maliana husu Estadu tau a’as interrese nasionál no tuir mai mak ida-idak hala’o nia polítika hodi lori nasaun ne’e ba oin.
Iha sorin seluk, Bispu Dioseze Baucau, Dom Leandro Alves, hateteb, iha momentu ne’ebá povu ho aten brani hili ukun rasik-an.
“Tanba ne’e, ha’u hato’o parabéns ba ita-nia nasaun ho aten brani no matenek hili auto-determinasaun ida-ne’e. Ita povu sira kontinua fó liman ba malu ho ita-nia na’i-ulun sira no Estadu atu konstrui ita-nia nasaun ida-ne’e ho di’ak tanba ita tinan-25 ne’e hatudu ita-nia maturidade iha forma no harii Estadu ida-ne’e,” Bispu Dioseze Baucau dehan.
Nune’e mós, Reprezentante Santa Selé iha Timor-Leste, Monseñor Marco Sprizzi, hateten, hafoin harii Estadu, kontinua dalan dezenvolvimentu ba igualdade sosiál hotu iha justisa hodi luta hasoru kualkér tipu korrupsaun.
“Vatikanu Santa Sé Timor-Leste parabeniza povu timoroan sira ba komemorasaun loron Konsulta Populár ba dala-25, ne’ebé fó liberdade ba povu ne’e. Iha tempu ne’ebá apóstolu João Paulo II, antigu Prezidente Portugal, Barroso, ha’u hetan nia iha aeroportu ne’ebé nia ko’alia kona-ba koñesimentu João Paulo II, nune’e nia haruka ha’u halo orasaun kalan no loron tanba ha’u ta’uk no ha’u mós fó rezultadu husi orasaun ne’ebé ema hotu halo iha inan-aman no to’o iha tempu ne’ebá apóstolu Paulo bele hetan rezultadu boot ida-ne’e tanba liberdade atubele hetan determinasaun ba ukun rasik-an,” eprezentante Santa Sé, haktuir.
Marco hatutan, atu la’o tuir fiar nia identidade mak apóstolu Francisco mai iha okaziaun hafoin loron 30 agostu.
“Nia to’o iha loron 09 setembru no sei fó bensaun ba povu sira no kontinua iha dalan fiar, liberdade no dame,” nia tenik.
Jornalista : Osória Marques
Editora : Julia Chatarina
