GAVI hakarak apoia Timor-Leste iha área saúde
DILI, 29 agostu 2024 (TATOLI)— Eis Primeiru-Ministru Portugal períodu 2002-2004, José Manuel Durão Barroso, ne’ebé agora daudaun hala’o kna’ar nu’udar Prezidente Aliansa Globál ba Vasinas (GAVI) hato’o nia intensaun atu fó apoiu ba Timor-Leste iha área saúde.
“Ami ko’alia espesifikamente kona-ba GAVI (Aliansa Global ba Vasinas), ha’u hanesan Prezidente GAVI, distribuisaun ne’ebé ita halo no saida mak ita ajuda Timor-Leste iha kapítulu ida ne’e mós liuliu iha HPV ne’ebé tenke kombate, kankru serviks iha feto foin-sa’e sira, kontribuisaun saida mak ita fó mak hanesan apoiu finanseiru ne’ebé ita fó ba fornesimentu sistema saúde,” Eis-PM Portugal ne’e hateten ba jornalista sira hafoin remata enkontru ho Xefe Governu Kay Rala Xanana Gusmão, kinta ne’e.
Nia dehan tan, “ami análiza hela problema oioin hosi saúde, edukasaun, to’o koperasaun entre ha’u nia nasaun Portugal. Ha’u la’ós mai iha ne’e hodi reprezenta Governu portugés, maibé buat ne’ebé klaru maka ha’u iha interese ba buat hotu ne’ebé bele akontese entre Portugal ho Timór, nomeadamente kapítulu kona-ba formasaun ba profesór sira, kona-ba sistema justisa, no ida-ne’e troka opiniaun ida ne’ebé útil no interesante tebes.”
Nia mós rona opiniaun husi Primeiru-Ministru, Xanana Gusmão, nia análize kona-ba situasaun iha rejiaun aziátiku husi perspetiva adezaun Timor-Leste nian ba ASEAN no pozisaun Timor-Leste nian iha komunidade internasionál.
Iha okaziaun ne’e, Prezidente GAVI hala’o mós enkontru ho Ministériu Saúde (MS) Elia Amaral no Ministériu Negósiu Estranjeiru no kooperasaun (MNEK) Bendito dos Santos Fritas hodi ko’alia kona-ba pontu konkretu balun ba kooperasaun iha futuru ho objetivu atu kombate kualkér epidemia, no ho objetivu atu halo imunizasaun, no mós papél GAVI nian iha distribuisaun vasina.
GAVI, ka Aliansa Globál ba Vasina no Imunizasaun, harii iha tinan 2000 hodi hatán ba dezafiu sira ne’ebé nasaun sira ho rendimentu ki’ik hasoru hodi asesu ba vasina sira.
Iha tinan 1990 nia rohan, labarik barak iha nasaun sira ne’ebé sei dezenvolve hela la hetan imunizasaun ne’ebé presiza, ho labarik millaun 30-resin ne’ebé seidauk hetan vasinasaun kompletu. GAVI hakarak rezolve problema ida-ne’e liuhosi fornese asesu di’ak liu ba vasina sira.
Jornalista: Hortencio Sanchez
Editór: Florencio Miranda Ximenes
