LIQUIÇA, 29 agostu 2024 (TATOLI)-Povu iha Postu Administrativu Loes, Munisipiu Liquiça, kontente ho prezensa membru governu iha ámbitu komemorasaun Konsulta Populár ba dala-25.
Administradór Postu Administrativu Loes, Francisco Xavier hateten, nu’udar Administradór Postu Administrativu Loes sente orgullu ba komemorasaun loron Konsulta Populár tinan ne’e tanba Governu sentrál bele koloka membru Governu balun ke mai iha ne’e bele akompaña sira-nia situasaun iha ne’e reál.
“Kontente tanba loron Konsulta Populár ida-ne’e mak loron determinasaun ba povu Timor-Leste nia ne’ebé povu hotu antuziasmu atu bele tuir no kompriende loron bo’ot Konsulta Populár nia,” Francisco Xavier hateten ba jornalista sira bainhira akompañia SeKoms Expedito Dias Ximenes, halo enseramentu ba jogu komunitária hodi komora loron Konsulta Populár ba dala-25 iha Postu Administrativu Loes Munisipiu Liquiça, kinta ohin.
Iha sorin seluk, Veteranu Postu Loes, Venerato Araujo Moniz” Mesak Laloran”, hateten, nu’udar ema veteranu ida primeiru agradese ba planu governu, hakbesik Governu ba komunidade, tanba durante ne’e komunidade hein hela programa sira hanesan ne’e.
“Desde horseik no horbain rua komunidade iha ne’e sente orgullu, ida-ne’e mak nu’udar veteranuu h’au agradese ba planu Governu nian,” nia afirma.
Nia rekomenda ba IX Governu konstitusionál atu tau matan ba Postu Administativu Loes tanba nu’udar postu foun ne’ebé foin hamriik iha fulan ida ba kotuk tanba ne’e sei falta buat barak.
“Ita bele dehan buat foun ne’e susar ne’ebé se bele, haree ami-nia rekursu umanu ne’ebé mak iha nasional ka munisípiu ne’ebá bele koloka tán mai iha ne’e atu ami bele hamutuk atu bele dudu ami-nian programa dezenvolvimentu postu foun ida-ne’e, nune’e postu ne’e bele la’o di’ak liután,” nia fó-hanoin.
Nune’e mós Xefe Aldeia Dorlemo Suku Lisadila, Mariano Gonsalves sente orgullu no kontente tebes ba loron Konsulta Populár ida-ne’e tanba iha loron ida ne’e determina nasaun nia futuru.
“Ha’u husu ba Governu sé bele loke mós jogu amizade sira hanesan ne’e ba oin tenke kontinua atu bele akomula ami joven sira iha suku Lisadila. No, Lisadila hanesan suku ne’ebé rurál tebes atu ba oin kria postu polísia iha fatin ne’e para prevene joven labele halo arbiru tanba tempu ohin loron ne’e modernu joven bele halo arbiru,” nia akresenta.
Nia husu ba joven sira iha Lisadila tenke koopera tanba dala barak joven sira iha área ne’ebá ladun koopera ho ferik no katuas sira eventu sira hanesan ne’e joven la partisipa katuas ferik mak partisipa.
Komunidade Mariano Maia, sente orgullu tanba loron 30 agostu loron Konsulta Populár ba timor-oan hotu.
“Ha’u nu’udar povu 30 agostu 1999 ne’e entre kontente no triste ha’u rekomenda mak ne’e Loes nu’udar postu foun foin hamriik, ba oin ami husu ba Governu tau-matan ba ami postu foun ida-ne’e,” nia konklui.
Jornalista: Natalino Costa
Editór: Rafael Ximenes de A. Belo
