BAUCAU, 29 agostu 2024 (TATOLI) – Igreja Katólika liuhosi Vigáriu Provinsiál Salezianu Dom Bosco, hateten ho komemorasaun loron Konsulta Populár ba da-25, tempu ona ba timoroan hotu kontribui ba prosesu dezenvolvimentu nasionál.
Padre selebrante, Lino Quintão Asis Belo, SDB, esplika, domin mai hosi Maromak nune’e ema hotu tenke hatene hadomi malu, hadomi nasaun tanba liuhosi domin bele atinje hanesan dame, pas, estabilidade no lori dezenvolvimentu.
“Ho domin ita bele rezolve buat hotu, liuliu ita-nia rai nia di’ak, kuandu ho domin bele atinje buat hotu,” Vigáriu Provinsiál Salezianu Dom Bosco hosi Jakarta, Indonézia, prezide misa iha Igreja Katedrál Vila Antiga, sesta ne’e.
Igreja sempre hakaas-aan atu ema hotu hakbesik ba Maromak liuhosi pastorál ne’ebé halo iha kreda hanesan nafatin haklaken Maromak nia domin ba ema hotu.
“Kandu Timor-Leste atu sai avansadu, tenke hadomi uluk rai lorosa’e, joven sira tenke hamutuk ho lideransa nasionál no tenke hatene hadomi malu nune’e bele hamutuk lori dezenvolvimentu ba nasaun,” Padre ne’e subliña iha omília.
Padre ne’e hateten, Estadu sempre iha hanoin di’ak ba rai Timor-Leste hanesan planu estratéjiku ba dezenvolvimentu maibé nu’udar sidadaun tenke hatene kontribui bainhira implementa ema idak-idak bele simu ho domin.
“Estadu bele halo buat hotu hanesan aloka orsamentu maibé ita la fó aan atu serbisu hamutuk liuliu vontade, ne’e ita labele atinje mehi sira-nee,” Padre Lino akresenta.
Entretantu Autoridade Administrasaun Munisipál Baucau, ohin, realiza misa hodi komemora loron Konsulta Populár ba da-25 ne’ebé prezide husi Padre Lino,SDB, Padre Adérito, SDB no Padre Benediktus Random ne’ebé partisipa husi Prezidente Autoridade Munisípiu Baucau, Veneranda Lemos, Ministru Ensinu Superiór, Siénsia no Kultura, José Pereira Jerónimo, autoridade sivíl no militár, funsionáriu públiku, estudante inklui komunidade sira.
Alende misa, Autoridade Munisipál Baucau hamutuk ho komunidade inklui Ministru Ensinu Superiór direita ba kari ai-funan iha semtériu haat hanesan Buibau, Urna Saudozu Vicenti Reis ‘Sahe’ iha Bucoli, Osoáriu Fatumaca no jardín ba eroi Dobuuai, Postu Administrativu Quelicai.
Jornalista : Natalino Belo
Editór : Evaristo Soares Martins
