LIQUIÇA, 29 agostu 2024 (TATOLI) – Sekretáriu Estadu Komunikasaun Sosiál (SEKOMS), Expedito Dias Ximenes ho ekipa, akompaña husi Administradór Postu Administrativu Loes, Francisco Xavier dos Santos, Xefe Suku Giso, Xefe Suku Lisadila no Vatuboro enserra jogu komunitáriu iha Postu Administrativu Loes, Munisípiu Liquiça.
Expedito sente orgullu tanba bele hetan oportunidade hodi partisipa iha serimónia enseramentu jogu komunitáriu ne’ebé realiza husi joven Postu Administrativu Loes.
Nia dehan, atividade ida-ne’e nudar parte ida husi atividade komemorasaun loron Konsulta Populár ba dala-25.
“Ha’u haksolok tebes bele mai asiste joven sira-nia talentu husi joga futebol, ohin ita hahú ho jogu ba manan na’in terseiru lugar no agora ba manán na’in primeiru lugar iha jogu sempre iha balun manán no lakon, ohin loron ne’e laos importante lakon ka manán, maibé atividade ohin ne’e ita atu selebra ba loron aban nian. Tanba loron aban ne’e nudar loron istóriku ba povu Timor-Leste tomak, loron vitória, loron reflesaun”, Expedito afirma iha nia intervensaun bainhira halo enseramentu ba jogu komunitária ne’ebé halao iha Postu Administrativu Loes Munisípiu Liquiça, kinta, ohin.
Governante ne’e dehan, komemorasaun loron konsulta populár ba dala-25 tinan ne’e nudar loron ne’ebé memoria ba povu Timor-Leste nia auto determinasaun. Iha tinan 25 ba kotuk husi joven, katuas, ferik afirma espiritu determinasaun hodi determina ita-nia destinu.
“Aban ita komemora loron istóriku no loron vitória ida-ne’e no ohin ita festeza. Primeiru- Ministru ita-nia maun bo’ot Kay Rala Xanana Gusmão hato’o kompriementu ba joven hotu, inan aman sira hotu, atu ita hotu hamutuk hodi selebra loron istóriku ida-ne’e”, nia adianta.
Expedito afirma, membru Governu hotu kolokadu iha Postu Adminitrativu hotu atu selebra istóriku ida-ne’e.
“Ita hotu haksolok atu hanoin fila fali ita-nia sofrimentu iha tinan 25 liu ba ne’ebé ohin ita sai nasaun livre no independente no soberanu. Ita iha ona servisu atu bele oinsá dezenvolve ita-nia rai hodi luta liberta ita-nia povu, joven sira”, nia afirma.
Nia husu joven sira atu hateke ba oin, hadomi pás, hadomi estabilidade tanba ho pás no estabilidade mak bele lori prosesu dezenvolvimentu ba oin.
“Parabens ba joven sira, parabens ba povu tomak, liuliu povu iha Postu Administrativu Loes, ita haksolok tanba ita bele komemora loron istóriku, loron vitória, loron reflesaun 30 agostu 2024, parabens ba joven sira, susesu ba alin sira joven sira. Ha’u lori Governu Konstitusional nia naran ensera futebal ida-ne’e”, nia dehan.
Iha fatin hanesan, Administradór Postu Administrativu Loes, Francisco Xavier dos Santos, subliña, Postu Administrativu Loes hetan fundu husi Ministériu Administasaun Estátal ho montante $2.500 no hetan apoiu osan husi SEKOMS ho osan $1.350 hodi realiza atividade ba komemorasaun loron konsulta populár tinan ne’e.
Nia dehan, iha atividade jogu komunitáriu SEKOMS apoia farda no bola ba joven sira iha Postu Administrativa Loes.
“Osan sira ne’e mak ami jere hodi halo atividade konsulta populár ba dala-25 iha tinan ne’e”, nia afirma.
Francisco hateten, atividade sira ne’e hodi priénse loron konsulta populár ba dala 25 tinan ne’e mak jogu komunitáriu dada tali, tata berlindu, taru halai karon, depois iha mós kompetisaun ba ai-han lokál sira.
Nia dehan, parte kalan ne’e sei iha divertimentu kona-ba dansa kultura no kultura show hodi hatudu ba públiku katak kona-ba identidade kulturál povu Postu Administrativu Loes nian, tebe-tebe, dadoli lia no loke fimajen 30 de agostu 1999.
Administradór Loes ne’e dehan, kona-ba jogu komunitáriu hahú iha semana kotuk, partisipa husi klubu neen husi suku tolu iha Postu Administrativu Loes.
Klubu FC Naroman mak sai vensedór, primeiru lugár ba jogu komunitáriu ba loron konsulta populár ba dala-25 hafoin halakon nia adversáriu FC Kedai ho liu husi suta penalidade ho skore 4-2.
Jornalista: Natalino Costa
Editór : Zezito Silva
