BAUCAU, 30 agostu 2024 (TATOLI) – Autoridade lokál liuhusi selebrasaun loron konsulta popular ba da-25 husu joven-sira kontribui ba pas no estabilidade iha Baucau.
Administradór Postu Administrativu Baucau, Aires de Fátima Correia, esplika, ho selebrasaun loron konsulta populár ne’e líder hahú husi nasionál too lokál hotu tenke halo reflesaun hamutuk ho komunidade nune’e bele hasa’e konsénsia hodi kontribui ba pas no estabilidade inklui lori dezenvolvimentu ba Nasaun.
“Ba oin mos tenke nafatin hatudu katak Baucau la hanesan uluk, maibé ba oin, ha’u husu kria pas no estabilidade liuliu iha Postu Baucau Vila,” Administradór Postu Administrativu Baucau Vila hateten iha Vila Antiga, kinta ne’e.
Reflesaun inportante liuliu halo asaun pozitivu sira hanesan hakbesik an ba komunidade, kria amizade liuhusi jogu komunitáriu nu’udar parte kria unidade iha loron inportante sira hanesan konsulta populár.
Aires Correia, argumenta durante tinan-25 Timor-Leste determina an hodi hili dalan referendu, problema sosiál kontinua akontese hanesan konflitu entre juven-sira, klase ekonomia kontinua mosu no dezenvolvimentu seidauk másimu.
Situasaun ne’e sei akontese mós iha Postu Administrativu Baucau Vila tanba lideransa lokál seidauk esforsu másimu atu hakbesik an ba komunidade, liuliu joven-sira maibé bainhira laiha klase sosiál entre lideransa ho komunidade situasaun konflitu bele redús no iha hakmatek laran.
“Ita bele konsidera katak liuhusi reflesaun bele halo kontente eroi hotu nia klamar tanba bele dehan sira-nia luta lori vitória ba Timor-Leste,” Aires Correia akresenta.
Aires Correia, husu, komunidade kontribui liuhusi hakbesik an nafatin ho líder lokál-sira atu nune’e bele kompriende kona-ba planu dezenvolvimentu ne’ebé estadu sei hala’o iha baze.
Jornalista : Natalino Belo
Editór : Evaristo Soares Martins
