Bankada CNRT husu ONU realiza referendu ba povu Sahara Osidentál

DILI, 30 agostu 2024 (TATOLI)—Deputada husi bankada CNRT, Aliança da Conceição Araújo, husu Sekretáriu Jerál Organizasaun Nasaun Unida (ONU), António Guterres, atu apoiu realiza referendu autodeterminasaun povu Sahara Osidentál, Palestina ho nasaun seluk ne’ebé agora luta hela ba sira-nia liberdade no direitu independénsia ba autodeterminasaun.
Notísia Relevante: PN kria komisaun enventuál akompaña povu Sahara Osidentál
Nia hakarak lori bankada nia naran, fó lembra ba Sekretáriu-Jerál ONU ho situasaun povu irmaun Sahara Osidentál, Palestina no sira seluk, ne’ebé agora luta ba sira-nia liberdade, emansipasaun no sira-nia direitu independénsia hanesan povu no nasaun iha marsa povu sivilizadu iha mundu inteiru.
“Espera hanesan Sekretáriu Jerál ONU, tau atensaun ba sofrimentu povu nian no kondús realizasaun sira-nia direitu fundamentál tebes, antes mandatu, kondús, entaun ONU, konkretiza direitu fundamentál tebes ba povu kolonizadu hanesan kontribui ba pás mundiál no mundu ida sivilizadu no ekilibradu,” nia hato’o liuhusi deklarasaun polítika iha sesaun solene komemorasaun loron konsulta Populár ba da-25 (30 agostu 1999-30 agostu 2024), iha sala plenária Parlamentu Nasionál, sesta ne’e.
Deputadu PD, António da Conceição “Kalohan’’, dehan independénsia Timor-Leste nu’udar kazu susesu ba istória Nasaun Unida, organizasaun eziste depois fim funu malirin, iha ne’ebé nasaun sira iha mundu reune hodi manifesta ninia kompromisu promove diálogu no kontrusaun pás iha planeta.
“Maibaé, iha tempu ohin loron, haree kontinua ezisténsia funu hanesan funu iha Ukránia, Médiu Oriente no ameasa uzu arma nuklear husi nasaun balun ne’ebé iha hodi halo destruisaun umanidade,” nia hateten.
Tuir nia, Nasaun Unida agora preokupa ho situasaun sira-ne’e no Timor-Leste hanesan nasaun sente sofrimentu povu hotu-hotu nian, nune’e apela ba ONU kontinua ninia esforsu hamutuk ho nasaun sira seluk espesialmente Estadu Unidu Amérika (EUA) no mós ativamente propor cessar fogo iha Gaza hodi termina funu entre Israel no Palestina no mós promove diálogu hodi termina funu iha Ukránia.
Entretantu, sesaun solene komemorasaun loron konsulta Populár ba da-25 (30 agostu 1999-30 agostu 2024) ne’e partisipa husi Sekretáriu Jerál Organizasaun Nasaun Unida (ONU), António Guterres, Prezidente Repúblika, José Ramos Horta, Primeiru-Ministru, Kay Rala Xanana Gusmão, membru Governu Konstitusionál da-sia, bainaka espesiál husi rai-li’ur, korpu diplomátiku ho bainaka sira seluk.
Notísia Relevante: PN aprova $50.000 akompaña povu Sahara Osidentál nia auto-determinasaun
Jornalista : Nelson de Sousa
Editór : Cancio Ximenes

