DILI, 30 agostu 2024 (TATOLI)–Prezidente Sindikatu Traballadór Timor-Leste (KSTL), Almeiro Vilanova, hateten Timor-Leste komemora ona loron konsulta populár ba da-25 (30 agostu 1999-30 agostu 2024) ne’e, nune’e traballadór timoroan presiza saláriu dignu iha sira-nia serbisu fatin.
Tuir nia situasaun sosiál no ekonomia populasaun kontinua iha problema no asuntu sosiál ida-ne’ebé presiza iha solusaun, tanba traballadór sira kontinua simu saláriu mínimo $115.
“Salariu minimu la koresponde ba iha demanda uma laran hanesan transporte ba serbisu, ba han, haree oan no seluk tan,” Prezidente KSTL, Alméiro Vilanova, esplika ba Agência Tatoli, iha Mandarin.
Prezidente KSTL husu atu entidade hotu-hotu komprende no analiza asuntu ne’e hodi ema traballadór sira bele hetan saláriu dignu no iha bein estar familia.
Nia sujere ba Governu Konstitusionál da-sia (IX) atu apoia setór informál sira hodi hetan asesu kréditu osan.
“Fó kréditu ba sira-ne’ebé faan iha dalan ninin hanesan faan bakso, faan gorengan no seluk tan. Labele duni sira, maibé define fatin estratéjia ida hodi hahú negósiu kiik,” nia sujere.
Tuir nia, situasaun ekonomia populasaun la’o liuhusi negosiu kiik sira atu ema hadi’a ema-nia moris no sustenta família.
Kalkulasaun Prezidente nian, populasaun moris ho setór informál ne’e hamutuk liu 70% hodi sustenta moris.
Jornalista : Jesuína Xavier
Editór : Cancio Ximenes
