BAUCAU, 30 agostu 2024 (TATOLI)- Prezidente Autoridade Munisipál (PAM) Baucau konsidera selebrasaun loron Konsulta Populár ba da-25 nu’udar loron reflesaun ba povu Timor-Leste.
Prezidente Autoridade Munisipál (PAM) Baucau, Veneranda Eurico Marques Lemos Martins, sauda komunidade Baucau oan relasiona ho selebrasaun loron konsulta popular ba da-25 hodi halo reflesaun kle’an kona-ba esforsu ba hahalok barani no matenek husi funu na’in ne’ebé determina terus durante tinan-24.
“Durante tinan-24 laran povu terus nonok, hein oportunidade atu konkista direitu ne’ebé konsagra iha rezolusaun ne’ebé garante povu nia direitu husi koloniazmu ba auto determinasaun independénsia,” Prezidente Autoridade Munisipál Baucau hateten iha resintu Administrasaun Vila Nova, sesta ne’e.
Mudansa konjuntura internasionál iha tempu ne’ebá hamosu kondisaun di’ak atu Indonézia liuhusi Prezidente BJ Habibie aseita hodi ekolla destinu Timor-Leste liuhusi referendu tanba hakarak ukun rasik aan.
Nune’e iha loron-05 maiu nasaun rua hanesan Indonézia no Portugál asina akordu konjunta hodi Povu Timor-Leste determina destinu Ukun aan liuhusi hili referendu iha loron 30 fulan-agostu tinan-1999.
“Ohin iha territóriu tomak, povu hotu selebra daudaun loron istóriku ida-ne’e hodi komemora no hanoin hikas buat ne’ebé akontese iha tinan-25 liubá,” Veneranda Lemos akresenta.
Eis deputada ne’e konsidera povu mak eroi loloos ba auto determinasaun tanba maoria povu mak deside ukun rasik aan ne’ebé barak mak mate hafoin realiza votasaun ba referendu.
Data 30 agostu 1999 nu’udar loron istóriku ba Timor-Leste ne’ebé liuhusi selebrasaun ba da-25 nu’udar onra ba sakrifísiu hotu husi eroi sira-nia mate nune’e bele sai memória ba povu nia moris di’ak iha futuru.
“Loron 30 agostu simboliza hakat fundamentu iha viajen ida ba independénsia,” Lemos argumenta.
Selebrasaun loron konsulta populár ba da-25 iha munisípiu Baucau realiza ho reflesaun, animasaun, fahe prémiu ba ekipa manán-na’in ne’ebé antes hala’o jogu komunitáriu hanesan futeból no basketeból.
Alende ne’e, Munisipiu Baucau mós realiza atividade hanesan palestra no misa agradesimentu inklui kari ai-funan iha Osoáriu Fatumaca, semitériu Buibau, urna saudozu Vicentie Reis ‘Sahe’no jardín eroi Dobuu.
Jornalista : Natalino Belo
Editór : Evaristo Soares Martins
