Konfrontu iha Macadique, PNTL detein suspeitu na’in-ualu
VIQUEQUE, 30 agostu 2024 (TATOLI)- Polisia Nasionál Timor-Leste (PNTL), Munisípiu Viqueque, detein suspeitu na’in-ualu ne’ebé komete aktu krime ka konfrotu iha suku Macadique, Postu Administrativu Uatulari, munisípiu Vqueque maizumenus tuku 07:00 kalan, 29 Agostu 2024, rezulta motorizada ida hetan sunu no uma komunidade 10 hetan estragu.
Tuir kronólojia ne’ebé Komadante Eskuadra Uatulari munisípiu Viqueque, Inspitór Asistente Polísia, Pedro Francisco de Carvalho, konta, akontesimentu konfrontu mosu iha suku Macadique bainhira mate isin ida lori husi Dili mai postu Uatulari. Maibé, to’o iha aldeia Kaidaua Lari, suku Macadique ema tuda ambulánsia ne’ebé tula mate isin.
“Liu minutu lima ha’u ho ekipa PNTL Eskuadra Uatulari to’o kedas fatin akonteseimentu hodi halo atuasaun no situasaun sai normál. Laiha tán kazu ruma akotese”, relata Pedro Francisco de Carvalho, ba joranlista sira, iha Eskuadra postu Uatulari, ohin.
Kona-ba konfrontu komadante PNTL eskuadra Uatulari afirma, akontesimentu horikalan PNTL asegura ona autór ba estraga uma komunidade no sunu motór na’in-8 kompostu husi naran inisiál hanesan JS (24),APA (24), BDS (32), OS 32, JFM (20), VS (24) no SS.
“Autór sira-ne’e agora ami halo investigasaun iha eskuadra, depois prosesu investigasaun hotu ami sei entrega ba Ministériu Públiku (MP). Tanba konfrontu referida ho tipu kazu asaltu”, nia informa.
Ho kazu ne’e, Komandu PNTL Eskuadra Uatulari sei kontinua esforsu hodi buka tuir autór sira-ne’ebé envolve iha kazu asaltu ne’e.
Nune’e nia husu, joven sira redús aktu krime no se maka hakarak koko nafatin krime PNTL sei foti medida ida-ne’ebé regirozu hasoru autiór sira.
“Tanba akontesimentu horikalan, ita sei la fó tán fatin ba ema seluk, atu kontinua. Sé maka halo nafatin ami foti asaun regirozu duni”. Nia alerta.
Iha fatin ketak, Reprezentante vitima iha aldeia Kaidaua Lari, suku Macadique, Grigório Soares, haktuir, akontesimentu ne’e ema akompaña mate isin, depois ema dehan tuda. Entaun komesa mosu tuda malu hodi rezulta uma komunidade hetan estragu no sunu motorizada ida hetan sunu.
“Ami-nia uma iha kuaze 10 maka hetan estragu, ha’u-nia motorizada rove fit ida ema sunu hotu, ha’u-nia uma odamatan tuda aat no armáriu vidru rahun hotu. Akontesimentu ida-ne’e ha’u sente triste no tenke prosesu kazu ne’e ba oin”. nia hato’o.
Tuir observasaun jornalista Agência Tatoli, sesta (30/08) iha fatin akontesimentu hatudu motorizada ne’ebé hetan sunu sei rai iha estrada ninin, komunidade sira-ne’ebé nia uma hetan estragu tuir hein hela sira-nia uma. Enkkuatu situasaun atuál iha aldeia Macadique no iha postu Uatulari daudaun ne’e normál tanba parte PNTL eskuadra Uatulari no PNTL unidade espesiál kontinua halo vizilánsia iha postu administrivu Uatulari.
Jornalista : Vitorino Lopes da Costa
Editór : Florencio Miranda Ximenes
