DILI, 30 agostu 2024 (TATOLI)-Prezidente Parlamentu Nasionál, Maria Fernanda Lay, lori povu Timor-Leste (TL) nia naran hato’o benvindu ba Sekretáriu Jerál Organizasaun Nasaun Unida (ONU) mai TL hodi partisipa komemorasaun loron Konsulta Populár ba dala-25 (30 agostu 1999-30 agostu 2024).
“Deklara aberta sesaun plenária loron ohin, relativu komemorasaun loron Konsulta Populár ba dala-25 ho prezensa Sekretáriu Jerál Organizasaun Nasaun Unida (ONU), António Guterres,’’ PPN hato’o bainhira abertura sesaun solene komemorasaun loron konsulta Populár ba dala-25 (30 agostu 1999-30 agostu 2024), iha sala plenária Parlamentu Nasionál, sesta ne’e.
Vise Bankada FRETILIN, David Dias Ximenes “Mandati’’, hateten ho prezensa Sekretária Jerál Organizasaun Nasaun Unida (ONU) mai iha Timor-Leste hodi partisipa iha komemorasaun loron Konsulta Populár ba dala-25 (30 agostu 1999-30 agostu 2024) reforsa kompromisu komunidade internasionál konstrui pás.
“Onra bo’ot simu ita iha nasaun ne’e, enventu ne’e signifikante, ita-nia prezensa iha ne’e reforsa kompromisu komunidade internasionál konstrui pás, dezenvolvimentu sustentável no promosaun direitu umanu, valór hotu ne’ebé ita partilla empeña ninia implementasaun,’’Nia hato’o liuhusi deklarasaun polítika iha liuhusi deklarasaun polítika iha sesaun solene komemorasaun loron konsulta Populár ba dala-25 (30 agostu 1999-30 agostu 2024), iha sala plenária Parlamentu Nasionál, sesta ne’e.
Xefe Bankada PLP, Maria Angelina Sarmento, hateten okaziaun espesiál ho onra ba prezensa Sekretáriu Jerál ONU ninia vizita mai Timor-Leste hanesan testamuña ida ba amizade no parseria duradoura entre Timor-Leste ho Nasaun Unida.
Nia mós hato’o agradesimentu ba Governu Portugál ba ninia apoiu mantein ajenda Timor-Leste durante mandatu nu’udar Primeiru Ministru Portugál, iha 1995-2002, lideradu hosi António Guterres forte tebes envolve iha esforsu internasionál hodi rezolve krize Timor-Leste.
“ita-nia dedikasaun no kompromisu hanesan ita-nia kauza fundametál hodi garante ita-nia lian hodi bele rona,’’ nia dehan
Deputadu PD, António da Conceição “Kalohan’’, ho kontente tebes lori naran bankada PD sauda prezensa onoroza iha uma magna povu Timor-Leste nian hodi selebra Konsulta Populár ba dala-25.
Xefe bankada KHUNTO, António Verdiál de Sousa, lori bankada hato’o onra bo’ot no benvindu ba vizita Sekretáriu Jerál ONU nian mai Timor-Leste.
“Ita-nia prezensa iha ne’e, verdadeira previléjiu no hanesan sinál ida klaru ba kompromisu ONU ba nasaun ne’e,’’ nia hato’o.
Deputada CNRT, Aliança da Conceição Araújo, agardese ba prezensa Sekretáriu Jerál ONU ho povu Timor-Leste komemora loron Konsulta Populár ba dala-25.
Entertantu, sesaun solene komemorasaun loron konsulta Populár ba dala-25 (30 agostu 1999-30 agostu 2024), partisipa husi Sekretáriu Jerál Organizasaun Nasaun Unida (ONU), António Guterres, Prezidente Repúblika, José Ramos Horta, Primeiru Ministru, Kay Rala Xanana Gusmão, membru Governu da-sia, konvidadu espesiál husi rai-liur, korpu dimplomátiku ho konvidadu sira seluk.
Jornalista: Nelson de Sousa
Editór: Cancio Ximenes
