PPN destaka renova kompromisu luta kombate ki’ak iha Timor-Leste
DILI, 30 agostu 2024 (TATOLI)-Prezidente Parlamentu Nasionál (PPN), Maria Fernanda Lay, destaka, iha ámbitu komemorasaun loron Konsulta Populár dala-25 (30 agostu 1999-30 agostu 2024) atu renova ita-nia kompromisu ba futuru hodi konstrui Timor-Leste, atu bele luta hasoru dezafiu atuál sira ne’ebé nasaun ne’e enfreta hanesan povu barak sei moris ki’ak ho dezáfiu sira seluktan.
“Dezafiu sira ne’ebé enfrenta ohin loron diferente, maibé importante, hanesan pobreza ita-nia povu barak kontinua moris ho ki’ak, no falta oportunidade empregu ba ita-nia joven, kontinua iha dezáfiu iha edukasaun akadémika no profesionál, dezafiu iha asesu universál kuidadu saúde,’’ Líder órgaun lejislativu hato’o liuhusi intervensaun iha sesaun solene komemorasaun loron konsulta Populár ba dala-25 (30 agostu 1999-30 agostu 2024), iha sala plenária Parlamentu Nasionál, sesta ne’e.
No dezáfiu seluk mak papél feto iha sosiedade, no kontinua importa produtu husi rai-liur mezmu produtu sira ne’e loloos ita bele prodús, no dezáfiu hasoru alterasaun klimátika.
Nune’e ho dezáfiu sira ne’e levanta oinsá ita luta hasoru tanba medida ne’ebé loos ita-nia indepedénsia ne’e la’ós auzénsia domíniu estranjeiru maibé oportunidade ba kada labarik timoroan, no garantia justisa ba kada sidadaun no promesa futuru ida sustentável ba jerasaun tuir mai.
‘’Ida ne’e presiza serbisu ba oin, mezmu la fásil, entaun ho komemorasaun ne’e mai ita renova ita-nia kompromisu ba futuru hodi konstrui Timor-Leste la’ós de’it livre, maibé prósperu, la’ós de’it independente, maibé influente. Um farol de esperança para o nosso povo, um farol de esperança para o mundo, tanba ida ne’e nu’udar promesa ba ita-nia independénsia ita presiza kumpre. Ha’u husu labele haluha a dor do passado. Labele haluha luta ba liberdade, maibé mós labele haluha forsa no korajen hodi ita lori konkista liberdade ne’e, tanba forsa no korajem nesesita hodi konstrui ita-nia futuru,’’ ’’ lidér órgaun soberania daruak ne’e hato’o.
Entertantu, sesaun solene komemorasaun loron konsulta Populár ba dala-25 (30 agostu 1999-30 agostu 2024), partisipa husi Sekretáriu Jerál Organizasaun Nasaun Unida (ONU), António Guterres, Prezidente Repúblika, José Ramos Horta, Primeiru Ministru, Kay Rala Xanana Gusmão, membru Governu da-sia, konvidadu espesiál husi rai-liur, korpu dimplomátiku ho konvidadu sira seluk.
Jornalista: Nelson de Sousa
Editór: Cancio Ximenes
