SEKOMS apela joven sira tenke sai eroi ba dezenvolvimentu
LIQUIÇA, 30 agostu 2024 (TATOLI) – Sekretáriu Estadu Komunikasaun Sosiál (SEKOMS), Expedito Dias Ximenes, husu ba joven sira sai eroi ba dezenvolvimentu.
“Ha’u reprezenta Governu Konstitusionál mai iha Loes no membru Governu sira seluk mós namkari iha postu administrativu sira seluk, orientasaun Primeiru-Ministru nia katak festa tinan 25 konsulta populár ne’e festa povu nian. Ita tenke selebra ho kontente tanba ne’e mak ha’u husu ba joven sira atu bele hanoin didiak ita-nia servisu ba oin sei naruk, joven sira tenke prepara aan atu eskola ho di’ak. joven sira ne’ebé ho idade boot daudaun tenke sai eroi foun ba ita-nia dezenvolvimentu, ita nia aman, katuas sira ne’ebé mak uluk sai ona eroi ba luta libertasaun, joven sira agora tenke sai eroi foun ba dezenvolvimentu nasionál”, Expedito Dias Ximenes, iha nia intervensaun durante komemorasaun Loron Konsulta Populár ba dala 25 ne’ebé mak halao iha Suku Guiso, Postu Administrativu Loes, Munisípiu Liquica.
Governante ne’e husu ba husu ba joven sira atu hatene istória 30 agostu 1999, tanba ne’e iha istória ida-ne’e sei hanorin iha eskola sira.
Nia dehan, komemorasau loron 30 agostu 1999, nudar festa populár katak povu maka manan, povu mak terus no povu mak sai eroi tanba ne’e Governu deside selebra festa konsulta populár ba dala 25, hamutuk ho povu iha suku sira postu adiministrativu no munisípiu sira.
Governante ne’e louva partisipasaun povu Loes nian iha ámbitu komerasaun loron konsulta populár ba dala-25.
“Ita bo’ot iha selebra konsulta populár ba dala 25, ne’e povu sira iha Loes hatudu sira-nia antusiasmu hodi partisipa loron istóriku no ida-ne’e ita louva tebes”, nia dehan.
Iha fatin hanesan, Administradór Postu Administrativu Loes, Francisco Xavier dos Santos, hato’o agradese ba SEKOMS ho komitiva ba loron tolu hamutuk hodi komemora loron konsuta popular 30 agostu 1999.
“Agradese tebes ba Sekretáriu Estadu Komunikasaun Sosiál ho nia komitiva ne’ebé destaka mai ami-nia postu Loes. Ita antuaziasmu tebes iha fatin ida-ne’e, tanba atu komemora loron konsulta populár ba dala-25. Ita-nia konsulta populár mak determina, ita-nia ukun aan ida-ne’e’’, nia konklui.
Jornalista: Natalino Costa
Editór : Zezito Silva
