CNE realiza edukasaun sívika iha Baucau
BAUCAU, 02 setembru 2024 (TATOLI) – Komisaun Nasionál Eleisaun (CNE, sigla portugés) realiza atividade edukasaun sívika ba komunidade sira iha munisípiu Baucau.
Diretór CNEunisípiu Baucau, Esmeraldo Damião Belo, esplika, durante tinan-2024 realiza akividade referida ba komunidade sira, hahú hosi iha sentru formasaun Carlos Gamba Fatumaca, suku Gariuai, Buruma no Triloka, postu Baucau Vila, enkuantu iha postu Quelicai iha suku Abafala no Macalaco.
“Ita-nia esperansa liuhusi edukasaun sívika ne’e atu eleitór-sira iha koñesementu kona-ba prosesu eleisaun sira hanesan direitu no devér,” Diretór CNE Baucau hateten iha Vila Nova, segunda ne’e.
Matéria iha atividade edukasaun sívika mak hanesan polítika podér lokál ne’ebé oradór mai husi autoridade administrasaun munisipál, partisipasaun feto iha vida polítika ne’ebé hato’o husi Sekretaria Estadu Inkluzaun Sosiál no STAE ne’ebé fo matéria kona-ba lala’ok eleisaun.
Esmeraldo Belo, sei kontinua realiza atividade referida iha suku neen antes períodu tinan-2024 tanba konsidera importante ba komunidade sira nune’e kontinua fahe hanoin sira relasiona ho kna’ar sidadaun nia kona-ba prosesu eleisaun.
CNE hamutuk ho STAE kontinua koordena hamutuk tanba nu’udar orgaun eleitorál nune’e nafatin halo preparasaun ba eleisaun suku foun hanesan Builai, Caibada Makasae no Werumata.
Jornalista : Natalino Belo
Editór : Evaristo Soares Martins
