DILI, 02 Setembru 2024 (TATOLI) – Ministériu Agrikultura, Pekuária, Peska no Floresta (MAPPF) aloka fundu liuhusi transferénsia públika ho montante rihun $341-resin atu disponibiliza ba grupu 150 husi munisípiu sira ne’ebé submete ona sira-nia proposta ba ministériu.
Ministru Agrikultura, Pekuária, Peska no Floresta, Marcos da Cruz, dehan nia parte simu ona informasaun katak iha proposta barak maka grupu sira husi munisípiu aprezenta ona ba kada diresaun hodi fó fundu atu implementa sira-nia programa iha área agrikultura, pekuária, peska no floresta.
“Ha’u husu ba dirijente sira iha kada diresaun ne’e atu informa mai ha’u saida maka ita-boot sira esforsu ona, tanba iha informasaun ne’ebé ha’u simu katak iha grupu barak tebes mak submete proposta mai ministériu”, governante ne’e husu ba dirijente sira iha salaun enkontru MAPPF, Comoro, ohin.
Ministru solisita ba ka diresaun iha MAPPF atu hatudu disponibilidade hodi apoia grupu sira ne’e, tanba orsamentu ne’ebé ministériu prevee ba kada diresaun atu utiliza hodi benefisia grupu sira ne’ebé iha planu di’ak atu dezenvolve sira-nia atividade.
Iha fatin hanesan, Diretór-Jerál Agrikultura, Kafé no Planta Industriál, Martino Laurentino Soares, relata katak nia parte mós simu ona proposta hamutuk 36 no agora prosesa ona inklui sira-nia konta bankária, nune’e bainhira proposta hetan ona aprovasaun husi ministru bele loke ona prosesu pagamentu.
“Ita prevee ona fundu hamutuk rihun $130-resin atu apoia ba grupu 36 ne’ebé submete ona proposta, tanba grupu sira ne’e kompleta ona sira-nia dokumentu, inklui konta bankária”, dehan.
Martinho Soares esplika katak grupu sira ne’e sei foka liu ba halo natar no to’os hanesan kuda hare, batar no modo sira.
Aleinde ne’e, Diretór-Jerál Pekuária no Veterinária, Carlos António Amaral, hateten nia parte halo ona verifikasaun ba dokumentu ka proposta ne’ebé grupu sira submete ona hamutuk 76 maka sei hetan apoiu. Tanba ne’e, Diresaun Pekuária prevee ona rihun $100 atu tulun grupu sira ne’e hodi bele realiza sira-nia programa iha área pekuária nian.
“Proposta 76 ne’ebé grupu sira submete ne’e, diresaun sei hasai kuaze rihun $80-resin hodi utiliza ba apoiu grupu, ne’ebé kada grupu sei hetan entre $3.000 no $4.000”, adianta.
Diretór-Jerál Peska, Akikultura no Jestaun Rekursu Akuátiku, Celestino Barreto, informa diresaun simu ona proposta 48 husi grupu sira, husi total proposta ne’ebé tama depois sira halo prosesu verifikasaun iha de’it proposta 24 maka pasa.
Proposta sira ne’e hetan ona aprovasaun husi Sekretáriu Estadu Peska, nune’e parte Diresaun Peska prevee ona fundu hamutuk rihun $71 atu apoiu grupu sira hodi kontinua haki’ak fini ikan no konstrui viveiru foun ba ikan oan sira.
Diretór-Jerál Floresta, Raimundo Mau, relata katak sira mós simu proposta hamutuk 19, maibé depois halo prosesu verifikasaun iha de’it 14 maka pasa.
“Husi proposta sira ne’ebé iha, diresaun prevee ona fundu hamutuk rihun $40 atu kuda fini ai-oan”, realsa.
Jornalista: Tomé Amado
Editora: Maria Auxiliadora
