DILI, 02 setembru 2024 (TATOLI)—Ministériu Edukasaun (ME) inklui estudante iha komemorasaun Konsulta Populár ba dala-25 iha loron 30 agostu, hodi halo atividade hanesan marsa husi Eskola Sekundária Jerál 04 Setembru UNAMET iha Balide no tuirmai iha dezempeñu teatru ida, hamutuk ho Institutu Nasionál Formasaun Dosente no Edukasaun (INFORDEPE).
Prezidente INFORDEPE, Domingos Martins, hateten, inisiativa ne’e ho objetivu atu hanoin hikas momentu difísil iha tempu Konsulta Populár no hafoin fó sai reazultadu.
“Timoroan barak halai mai iha ne’e tanba sira hetan ameasa husi milísia pro-Indonézia, sira barak hetan tortura no tanba ne’e ami hala’o aprezentasaun teatru ida-ne’e hodi hanoin-hetan situasaun susar no a’at ne’ebé akontese iha tinan-25 liubá,” Domingos Martins iha salaun Ian Martin, INFORDEPE, Balide, segunda ne’e.
Iha parte seluk, Antigu Reprezentante UNAMET, Ian Martin, hateten, teatru ne’e atu fó sai momentu ne’ebé akontese iha sede organizasaun nian.
“Iha loron 05 setembru, iha eskola ne’e nia sorin iha ahi-oan maka’as no família sira ne’ebé hela iha ne’ebá hahú halai ba sede UNAMET. Ami iha kabas iha didin leten, tanba ne’e ema hetan kanek tanba kabas iha didin leten no soe bebé sira iha kabas leten. Iha situasaun hanesan ne’e, ami loke portaun no loke ema sira-ne’e iha klase laran,” nia akresenta.
Notísia relevante : Komemorasaun Konsulta Populár nu’udar loron reflesaun
Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Uma Komunitária, Mariano Assanami Sabino, no Antigu Primeiru-Ministru Sekretáriu-Jerál Nasaun Unida (ONU), Tamrat Samuel, sai hanesan ema ne’ebé iha oportunidade atu haree dezempeñu teatru.
Marsa ne’e hahú iha edifísiu INFORDEPE, husi ne’ebá to’o Caicoli, liu husi Vila-Verde no Tuana-laran, no ikusmai halibur fali iha INFORDEPE.
Jornalista : Osória Marques
Editora : Julia Chatarina
